Charter Document - 03160052

Noverint universi quod Willelmus abbas monasterii sancti Augustini Bristoll et eiusdem loci conventus ex parte una et Henricus de Gaunt magister domus sancti Marci de Billeswyk in suburbio Bristoll et eiusdem loci fratres ex altera in nos Walterum dei gratia Wigorn episcopum expresse concesserunt et nostre ordinationi et diffinitioni sponte se submiserunt super communa quam predictus magister exigebat in planitie predicti monasterii et aliis inferius contentis Propter quod in nomine domini nostri Ieshu Cristi Amen nos dictus Walterus dei gratia Wigorn episcopus visa et intellecta veteri compositione inter dictas domos prius habita ac aliis idem negotium contingentibus ponderatis finem litibus inponere cupientes et ne alterius partibus in premissis iurgandi materia tribuatur de expresso earundem partium consensu ordinamus et ordinando diffinimus quod neutra ipsarum partium ius aut communam pascendi in dicta planitie in dicta compositione nominata sibi decetero vendicabit aut habebit cum utraque pars totam dictam planitiem recognoscat esse cimiterium monasterii supradicti sancti Augustini Et si contingat animalia partis alterutrius dictam planitiem causa pascendi ingredi seu si ibidem pascantur facta amonitione trina ei cuius fuerint per vicarium sancti Augustini minoris vel aliquem eiusdem ecclesie clericum pro altero ipsorum inde fugentur et si iterum redeant ad pascendum tunc idem vicarius vel clericus dicte ecclesie eadem includat donec per decanum loci liberentur salva nobis et successoribus nostris exactione dimidie marce nomine mulcte contra delinquentes quam rem nobis repromiserunt quotiens contra premissa venirent vel ad iudicium quoquomodo contra predictum diffinitionem provocarent rata insuper manente presenti ordinatione Et si forte dictus vicarius vel eius clericus in monendo fugando vel includendo ut predictum est fuerit negligens vel remissus favore vel odio alterutrius partis per loci diocesanum qui pro tempore fuerit vel eius officialem graviter puniatur Ordinamus etiam et ordinando diffinimus quod corpora de novo sepulta ante portam predicte domus sancti Marci ibidem remaneant ita tamen quod supereminens terra abradatur propter loci amenitatem conservandam et ad planitiem redigatur ita quod per abrationem predictam non minus cimiterium censeatur Item ordinamus et ordinando diffinimus ex supradicta causa amenitatis quod corpora defunctorum decetero sepeliantur in parte dicti cimiterii antea consueta nec aliquod ultra sepeliatur nisi loci diocesano vel eius officiali qui pro tempore fuerit videatur quod necessitas aut evidens utilitas id exposcat Item ordinamus et ordinando diffinimus quod inhabitantes dicte domus sancti Marci dictam planitiem ingredi possint et egredi causa eundi ambulandi spatiandi ubicumque voluerint et dreyes carectas bigas ducendi per vias utiles et sibi necessarias et ad hoc prius usitatas ac customarias Item ordinamus et ordinando diffinimus quod abbas monasterii predicti possit dictam planitiem falcare ubi herba fuerit falcanda sine alicuius impedimento et herbam spargere in ecclesiis suis sancti Augustini maioris et minoris hoc adiecto quod idem abbas aliquam defencionem que vulgariter appellatur hayingge non adhibeat quo magis dicte domus superius concessa impediantur falcator tamen cum ibi fuerit non impedietur in suo officio exequendo salvis etiam abbati et conventui sancti Augustini iuribus libertatibus et usibus quibus monasterium predictum sancti Augustini et conmorantes ibidem antea usi fuerint excepto iure pascendi tamen ut superius est expressum In cuius rei testimonium et huius ordinationis approbationem ac ut robur et firmitatem inter partes inperpetuum optineat huic scripto inter partes diviso sigilla ipsarum partium una cum sigillo nostro sunt alternati apposita Actum apud Bristoll die sabbati proxima ante festum exaltationis sancte crucis anno domini millesimo CC quinquagesimo nono