Charter Document - 03160048

Hec est ordinatio facta auctoritate et consilio venerabilis patris Walteri dei gratia Wygorn episcopi intervenientibus de consensu dominorum Roberti de Gurnay patroni elemosinarie sancti Marci de Billeswik et Henrici de Gaunt tunc magistri eiusdem de redditibus et terris per dictum Henricum perquisitis et ad dictam elemosinariam spectantibus scilicet de manerio de Stokland cum advocationibus ecclesiarum de Stokland et de Cantoksheved et de manerio de Herdicote et de La Lee cum pertinentiis et de terris perquisitis in Bruham et de molendino de Langford et de redditibus in villa Bristoll ordinatione per dominum Robertum de Gurnay prius facta et a predicto episcopo approbata de magistro et tribus capellanis in dicta elemosinaria habendis et de centum pauperibus Cristi singulis diebus ibidem reficiendis sicut in carta sua plenius continetur in suo robore nihilominus duratura Videlicet quod in numero dictorum centum pauperum sint duodecim scolares ad voluntatem predicti magistri admittendi et removendi in capis nigris et superpelliciis in choro tantum ministrantes pro dispositione cantoris quibus uberius prospiciatur secundum dispositionem eiusdem magistri et facultates domus ex quibus unus eligatur qui alios sciat disciplinare et instruere cui etiam uberius et competentius quam aliis provideatur Ad hec ordinatum est preter ordinationem predicti Roberti quod tres capellani sex clerici in sacris ordinibus constituti et quinque fratres layci ibidem habeantur habitum ad modum fratrum hospitalis de Lechlade deferentes excepto signo eiusdem elemosinarie quod est crux alba et scutum rubrum cum tribus anseribus albis in eosdem Quod si contingat dictos sex clericos vel aliquos eorum per dictum magistrum ad ordinem sacerdotalem promoveri exsequatur officium suum nihilominus ad invicem in ecclesia pro dispositione cantoris Ultra vero supradictum numerum capellanorum clericorum et fratrum plures ibidem non habeantur habitum predictum portantes Ita quod numerus capellanorum et clericorum tres decem non excedat nisi processu temporis domus creverint facultates et tunc sic accreverint in caritatem domus cedant prout magistro domus secundum deum visum fuerit expedire Cum autem aliquis in fraternitatem predictam fuerit admittendus et tempus probationis habuerit tunc tantum scutum in habitu suo imprimatur anno quoque probationis expleto et ydoneus inveniatur tunc profiteatur et tunc scutum cum cruce eidem apponatur vel infra tempus probationis si instanter pecierit et hoc ius dictaverit scutum cum cruce accipiat in superiori habitu impressum vovendo substantialia ordinis scilicet continentiam obedientiam et abdicationem proprietatis et alias dicte domus observantias regularius qui admittendus si infra tempus probationis minus idoneus reperiatur licenter absque contradictione recedat vel per eundem magistrum amoveatur In ieiuniis autem et aliis observantiis teneant et habeant modum et ritum fratrum hospitalis de Lechlade preterquam in divinis officiis in quibus se habeant et gerant secundum consuetudinarium et ordinale Sar Quod si contingat aliqua corpora mortuorum sepulture eiusdem loci legari vel principum seu prelatum quemcumque ibidem accedere liceat predictis capellanis et clericis in habitu eiusdem elemosinarie vel cum solempniori apparatu iuxta ritum Sar eisdem obviare ita quod dicto habitu non utantur alibi vel alias nisi tantum in choro vel alibi dum vacant officiis ecclesiasticis Circa autem missarum sollempnia celebranda ita se habeant predicti capellani et clerici in dicta elemosinaria videlicet quod una missa celebretur solempniter mane de beate virgine Marie secunda pro defunctis et tertia de die et hoc fiat singulis diebus ex debito Ceteri capellani celebrent missas suas tam pro vivis quam pro defunctis secundum dispositionem magistri et maxime pro benefactoribus domus Postquam vero celebrati fuerint missarum sollempnia et alia officia divina duo capellani et predicti sex clerici habitum domus portantes cum duobus fratribus laycis singuli cultellum in manibus portantes ad scindendum panem debilium et impotentium ad eorum voluntatem dictis pauperibus ministrant scilicet inter horam primam et tertiam ante prandium dictorum capellanorum et clericorum ut percepta ibidem portione sua nihilominus necessaria sibi possint alibi adquirere Dicti vero magister capellani et clerici et fratres habitum portantes in una domo dormiant similiter et in una domo scilicet in refectorio reficiantur set infra dictum refectorium nullus secularis comedat vel bibat nisi de speciali licentia magistri tantum nec etiam extra dictum refectorium aliquis eorum comedat vel bibat infra septa dicte elemosinarie nisi infirmitate detentus fuerit vel sanguine minutus et tunc in infirmaria ad hoc preparata et assignata pro dispositione magistri reficiatur Magister tamen propter adventum hospitum vel aliqua alia rationabili de causa in camera sua vel alibi ubi duxerit eligendum licenter prandeat hoc addito quando quod magister inter hospites suos in mensa esse noluerit vel aliqua causa prepeditus non poterit unum de predictis capellanis clericis vel fratribus habitum dicte elemosinarie deferentibus loco suo ad hoc subroget ad voluntatem suam verum etiam quotiens dictus magister extra dictum refectorium comederit unum vel duos de predictis capellanis habeat secum in mensa et etiam quotiens contigerit ipsum extra dormitorium iacere unum habant secum de dictis capellanis Similiter quotiens contigerit ipsum aliqua loca adire sive infra villam Bristoll sive extra ob quamcumque causam vel in quibuscumque negotiis Item nullus capellanorum clericorum vel fratrum supradictorum extra domum suam in eodem municipio comedat vel bibat nisi in presentia episcopi sui vel patroni vel in domibus religiosorum et hoc de licentia magistri vel vices eius gerentis assumptoque tunc secum aliquo de dictis capellanis clericis vel fratribus in habitu dicte domus simul proficiscantur et simul redeant ne aliquis eorum infra municipium vagando solus videatur deambulare Dicti vero magister et capellani tantum utantur mantellis nigris et almuciis nigris in mensa et infra septa dicte domus et alibi cum signo domus exteriori equitando tamen et infra municipium ambulando capas nigras habeant cum signo eisdem impresso Dicti autem capellani clerici et fratres bonum panem habeant de frumento similiter et bonam cervisiam bene brasiatam et bonum potagium cum uno ferculo et una pitantia secundum dispositionem magistri set vinum ad opus suum proprium non emant nec aliqua convivia faciant aliquos invitantes in dispendium et deteriorationem dictorum pauperum In prandio autem et in cena et ad collationem legatur aliqua lectio secundum quod moris est inter alios religiosos pro dispositione cantoris Item si aliquis de predictis capellanis et clericis scribere sciat vel utiliter notare ad preceptum magistri eaque usibus domus cedant commoditati scribere debet et notare Similiter si aliquis de dictis fratribus laycis in aliqua arte mechanica fuerit instructus ipsam exequatur ad preceptum magistri et ad profectum domus Preterea unusquisque predictorum fratrum laycorum officiis sibi a magistro assignatis tam extra domum predictam quam infra quando et quotiens necesse fuerit secundum dispositionem magistri diligenter intendat qui si in officio sibi commisso minus rite vel inordinate se gesserit ipso super hoc convicto ab eodem officio amoveatur et alius loco suo prout visum fuerit magistro expedire substituatur Hoc etiam adhibito quod si forte terra de Poulet que ad dictam spectat elemosinariam que est iuxta mare fluctibus maris aliquo tempore submergatur quod absit unde fructus dicte terre penitus vel maiori parte depereant hoc episcopo Wygorn qui pro tempore fuerit et patrono dicte elemosinarie per magistrum dicti loci demonstrato per eorum assensum facta prius super hoc inquisitione portio dictorum centum pauperum et sumptus circa eorum portionem impendendi moderetur quousque de dicta iactura dicta domus restauretur Concessit etiam dictus episcopus pro se et successoribus suis dictam domum sancti Marci quietam esse et absolutam a procuratione sua et a visitatione archidiaconi loci vel eius officialis et ab obedientia dicto archidiacono facienda quantum ad religiosos inperpetuum onus consisteret dictam domum et eius paupertatem pie respiciendo Facta tamen per eundem episcopum vel per eius officialem in dicta domo visitatione secundum formam iuris Nos quidem Walterus dei gratia Wygorn episcopus hanc presentem ordinationem inspiciendo eam auctoritate pontificali confirmamus In cuius rei testimonium sigillum nostrum unacum communi sigillo domus sancti Marci necnon et sigillis dominorum Roberti de Gurnay dicte elemosinarie patroni et Henrici de Gaunt tunc magistri eiusdem loci huic instrumento apponi fecimus Dat anno gratie millesimo CCLIX in crastino exaltationis sancte crucis