Charter Document - 03160012
| Charter Number: | 03160012 |
|---|---|
| Cartulary Title: | Worcester 1218-1268 Volume 13 |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1232 - 1233 |
| Date type: | Internal, A.D. |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Willelmus divina miseratione Wygornien episcopus salutem gratiam et benedictionem Cum iuxta continentiam litterarum apostolicarum ad nos per fratres hospitalis sancti Bartholomei inter pontes Glovernie impetratarum super cantaria in dicto hospitali habenda licentiam celebrandi divina concedere non possimus in preiudicium iuris alieni nos abbatem et conventum sancti Petri Gloucestrie qui oratorium in dicto hospitali constructum infra limites parochie sue contentum asseverant tandem induximus ad consentiendum divine pietatis intuitu et pro suarum remedio animarum ut in dicto oratorio divina celebrentur salvis in omnibus et per omnia eorum libertatibus consuetudinibus et articulis in privilegiis suis contentis tam de sepultura mortuorum quam de omnibus aliis Singuli autem custodes qui pro tempore fuerint in dicto hospitali constituti in principio sue creationis ante quam ministrare incipiant Ita tamen quod interim non cesset cantaria iurabunt coram episcopo Wygornien qui pro tempore fuerit in proximo adventu eius apud Gloverniam et in presentia aliquorum monachorum sancti Petri Glovernie quod nec per se nec per alium procurabunt occasione licentie celebrandi divina sibi concesse statum monasterii sui libertates iura consuetudines in aliquo ledi turbari vel diminui Si autem prefati custodes contrarium fecerint vel contra aliquem articulum in dictorum abbatis et conventus privilegiis contentum venire presumpserint per se vel per alios et super hoc convicti fuerint canonice vel confessi coram episcopo loci vel eius officiario vel alio per litteras suas patentes ad hoc deputato tam diu cesset cantaria in dicto hospitali donec predictis abbati et conventui secundum quantitatem delicti plenius fuerit satisfactum Hec compositio facta fuit anno ab incarnatione domini MCCXXXII In huius rei testimonium sigillum nostrum presenti scripto una cum sigillis partium duximus apponendum Hiis testibus magistro Ricardo Mamryn magistro Marcello domino Iohanne capellano domino Thoma decano Glovernie magistro Huberto et aliis