Charter Document - 03160008
| Charter Number: | 03160008 |
|---|---|
| Cartulary Title: | Worcester 1218-1268 Volume 13 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1218 - 1236 |
| Date type: | Assigned |
| Resource Link(s): |
|
Charter:
Universis sancte matris ecclesie filiis presens scriptum inspecturis vel audituris W divina miseratione Wyg episcopus eternam in domino salutem Ad universitatis vestre notitiam volumus pervenire quod cum priorissa et conventus monialium de Kochull ab antiquo percepissent de ecclesia sancti Nicholai de Alyncestr in qua ius patronatus habere dinoscuntur viginti solidos annuos et redditum terre pertinentis ad eandem et oblationes cere factas in purificatione beate Marie in eadem ecclesia nomine perpetui beneficii nos cum contingeret portionem quam Philipus habebat in eadem per mortem eiusdem vacare de consensu capituli nostri Wyg considerata tam paupertate dicte domus de Kochull quam honestate monialium ibidem deo deservientium dimidiam marcam de incremento preter predicta dictis priorisse et monialibus de dicta ecclesia annuatim percipienda et totam oblationem tam in cera quam in argento provenientem in eadem in die purificationis beate Marie divino intuitu et auctoritate dyocesana contulimus et preterea omnes decimas de assartis que dominus Willelmus de Botevens in dicta parochia de novo fecit et etiam omnes alias de assartis in eadem parochia faciendis pro agisturis Perpetuus autem vicarius qui pro tempore ministrabit in dicta ecclesia totum residuum cum omnibus pertinentiis eiusdem ecclesie que provenire poterunt percipiet et de pretaxato redditu duarum marcarum prefatis priorisse et monialibus ad duos anni terminos respondebit videlicet reddendo eisdem ad festum sancte Marie in Martio unam marcam et ad festum sancti Michaelis unam marcam Sustinebit autem dictus vicarius omnia onera episcopalia debita et consueta dictam ecclesiam contingentia In extraordinariis autem respondebunt tam dicte priorissa et moniales quam perpetuus vicarius quilibet pro portione sua Ut autem hec nostra collatio et ordinatio debite plenitudinis robur optineat imperpetuum eas presenti scripto sigilli nostri appositione munito salva nobis et successoribus nostris tam iure pontificali quam parochiali salva etiam dignitate Wygorn ecclesie duximus confirmandas Hiis testibus domino Willelmo de Tynton persona de Kemeseye Iohanne vicario de Hampton monialium Ricardo vicario de Rysindon capellanis magistris Marcello Matheo de Grymel Huberto Willelmo de Milay persona de Bredon Anketillo Iordano clericis et aliis