Charter Document - 03150310
| Charter Number: | 03150310 |
|---|---|
| Cartulary Title: | Exeter 1186-1257 Volume 12 |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1232 |
| Date type: | Internal, Episcopal, Feast |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Willelmus miseracione divina Exoniensis ecclesie minister humilis salutem in domino Qui celum terramque regit pietatis sue miseracione disposuit ut cultum divini nominis ampliantes intuitu caritatis partem cum ipso possideant in regno celorum et vitam sempiternam Cum igitur laborantibus in vinea domini Sabaoth panem dominicum largiri conveniat et eorum augmentare facultates iuri consonum ac deo sit acceptum qui divinis oracionibus iugiter insistentes virtutum ac vite decorantur excellencia necnon hospitalitatis munera iuxta suarum vires facultatum conferentes ad se confluentibus vultum hylarem pretendunt nos divine caritatis intuitu ecclesiam de Tunestall quamcito eam vacare contigerit ad donacionem religiosorum virorum abbatis et conventus de Thorr de iure spectantem eisdem abbati et conventui quantum in nobis est contulimus et concessimus in proprios usus inperpetuum possidendam cum omnibus ad eandem pertinentibus ita tamen quod eadem ecclesia divinis inposterum officiis non fraudetur set continue resideat ibidem capellanus secularis honestus et ydoneus qui se in ecclesia memorata excerceat utiliter et honeste Salva sit etiam in omnibus episcopalis et Exoniensis ecclesie dignitas In cuius rei testimonium huic scripto sigillum nostrum apponi fecimus Dat Exon in ascensione domini consecracionis nostre anno nono