Charter Document - 03150290
| Charter Number: | 03150290 |
|---|---|
| Cartulary Title: | Exeter 1186-1257 Volume 12 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1244 |
| Date type: | Assigned |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Willelmus miseracione divina Exoniensis episcopus salutem eternam in domino Noverit universitas vestra quod nos inspecta indulgencia felicis memorie Honorii pape tercii venerabili patri episcopo Sar et eiusdem loci capitulo super prebenda de Teington quam habuit ecclesia Sar in nostra dioecesi in usus perpetuos commune Sar concessa de capituli nostri Exon assensu unanimi et communi necnon de consensu unanimi et communi venerabilis patris domini R Sar episcopi et eiusdem loci capituli dicte prebende patronorum ordinationi nostre sponte se subicientium dampno ecclesie nostre Exoniensi et necessitate ecclesie Sar ex concessione huiusmodi sicut decet ponderatis communicate discretorum et deum timentium consilio de ecclesiis ad dictam prebendam spectantibus invocata spiritus sancti gratia ordinavimus in hunc modum videlicet quod ecclesia de Teignton cum capella de Teinguewyke et ecclesia de Ealminton cum capella sua et omnibus bonis ad dictas ecclesias et capellas spectantibus decetero sint prebendarie et eas episcopi Sar qui pro tempore fuerint cum vacaverint futuris et perpetuis temporibus conferant ut patroni ita tamen quod nobis et successoribus nostris representetur et a nobis et successoribus nostris instituatur is cui fuerit collata prebenda supradicta salvis competentibus vicariis Ecclesie vero de Kenton et de Alfinton cum earum capellis et proventibus et bonis quibuscumque ad eas spectantibus et decime de Evetruwe in commune Sar perpetuos usus cedant salvis competentibus vicariis Ecclesia vero de Hurberton cum capellis eiusdem et proventibus et bonis quibuscumque ad eas spectantibus cedat in perpetuos usus cotidiane distribucionis canonicorum Exoniensis ecclesie pro recompensacione multiplicis lesionis quam sustinet ecclesia nostra Exoniensis ex concessione supradicta Et ut hec nostra ordinatio rata et stabilis et inconcussa permanent inperpetuum presenti scripto sigillum nostrum una cum venerabilis patris episcopi Sar et capitulorum Sar et Exon sigillis apponi fecimus