Charter Document - 03150264
| Charter Number: | 03150264 |
|---|---|
| Cartulary Title: | Exeter 1186-1257 Volume 12 |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1238 |
| Date type: | Internal, A.D., Calendar, Episcopal |
| Resource Link(s): |
|
Charter:
Omnibus sancte matris ecclesie filiis presentes literas visuris vel audituris Willelmus miseratione divina Exoniensis ecclesie minister humilis eternam in domino salutem Quoniam omnes stabimus ante tribunal Cristi recepturi prout in corpore gessimus sive bonum fuerit sive malum ea propter nos oportet diem messionis extreme misericordie operibus pervenire ac eternorum intuitu seminare in terris quod reddente domino cum multiplicato fructu recolligere debeamus in celis Et licet omnibus misericordie opera passim inpendere teneamur viris tamen religiosis qui abnegantes salubriter semetipsos elegerunt in paupertate Cristo pauperi ad placitum famulari abundantius viscera pietatis in operibus misericordie favore religionis suadente debemus aperire Hinc est quod deo et ecclesie beate Marie Glaston et Michaeli abbati et successoribus suis et eiusdem loci conventui ecclesiam de Uplym divini amoris intuitu cum omnibus eius pertinentiis dedimus in proprios usus in perpetuum possidendam ita quod per ipsum Michaelem pro discretionis sue arbitrio adeo salubriter fructuum nostre largitionis in pios usus fiat conversio ut ecclesie Glaston benefactores fructuosas a domino recipient remunerationes et nostre gratie et eiusdem Michaelis prudentis ac salubris ipsorum temporalium dispositionis exemplo plurimorum ad ipsius ecclesie incrementa beneficiorum excitetur devotio salva tamen vicaria centum solidorum in eadem ecclesia per nos taxata et dictorum abbatis et conventus perpetua presentatione ad eandem cum vacaverit Vicarius vero qui pro tempore fuerit omnia onera ordinaria sustinebit extraordinariis inter ipsum et prefatos abbatem et conventum pro rata partiendis In cuius rei testimonium presenti scripto sigillum nostrum apponi fecimus Dat apud Chiddelegh anno gratie millesimo CCXXXVIII mense Decembris xvii kal Ianuarii pontificatus nostri anno xv