Charter Document - 03150242
| Charter Number: | 03150242 |
|---|---|
| Cartulary Title: | Exeter 1186-1257 Volume 12 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1231 - 1236 |
| Date type: | Assigned |
| Resource Link(s): |
|
Charter:
Sciant presentes et futuri quod ego W dei gratia Exoniensis episcopus concessi et hac presenti carta mea confirmavi omnibus hominibus de burgo meo de Criditon quod ipsi et heredes sui vel assignati eorum habeant et iure hereditario in pace possideant unumquodque burgagium in memorato burgo scilicet de una acra terre reddendo inde annuatim michi et successoribus meis octo denarios ad duos anni terminos scilicet ad festum sancti Michaelis quatuor denarios et ad pascha quatuor denarios pro omni servitio querela et exactione Concessi etiam dictis hominibus quod ipsi et heredes sui vel eorum assignati habebunt animalia sua in communi pastura mea cum ceteris hominibus meis et quod per electionem habeant prepositum et ballivos in predicto burgo et quod extra burgum suum non summoneantur nec implacitentur sed omnia placita eos contingentia infra burgum suum sine occasionibus tractentur et terminentur Concessi etiam quod bis per annum curia teneatur in eodem burgo de omnibus assisis et sectis et non amplius scilicet semel post festum sancti Michaelis et semel [ad] Pascha ita tamen quod alia placita burgi tractentur et terminentur in eodem burgo ad rationabilem sommonationem ballivorum meorum ita quod nullus burgensium sit in defectu ad illa placita terminanda nisi fuerit implacitatus Preterea concessi dictis hominibus quod si ipsi vel heredes sui vel eorum assignati in misericordiam meam vel successorum meorum inciderint quieti sint per sex denarios Et concessi quod cum relevium dandum fuerit pro relevio cuiuslibet burgagii dentur duodecim denarii Ut autem hec concessio mea firmitatem optineat perpetuam presentem paginam sigilli mei impressione duxi roborandam Hiis testibus magistro B archidiacono Exoniensi magistro I archidiacono Cornub T archidiacono Totton magistro R cancellario Exon Henrico thesaurario de Criditon Martino Prudum Ricardo de Bissopleg Hugone filio Willelmi Willelmo Probo Iohanne de Polton Roberto de Boloing et aliis