Charter Document - 03150198
| Charter Number: | 03150198 |
|---|---|
| Cartulary Title: | Exeter 1186-1257 Volume 12 |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1194 - 1206 |
| Date type: | Assigned |
| Resource Link(s): |
|
Charter:
Omnibus ad quos presens scriptum pervenerit Henricus dei gratia Exoniensis episcopus salutem in vero salutari Ecclesiasticis officiis insudantes dignum est ecclesiastica remuneratione gaudere Unde nos utilitati vicariorum ecclesie nostre Exoniensis qui die noctuque tam nocturnis quam diurnis officiis pro posse suo intendunt paterna provisione prospicere cupientes eisdem vicariis ecclesiam de Wodebir cum omnibus pertinentiis suis concedimus et confirmamus salva sustentatione capellani annui et clerici eidem ecclesie ministrantium qui quidem capellanus xi tantum solidos et clericus x nomine sustentationis annuatim percipient Statuimus autem ut soli vicarii viginti quatuor canonicorum antiquorum ecclesie nostre solita et antiqua stipendia a dominis suis percipientes xx scilicet solidos annuos in augmentum stipendiorum suorum ex nostra donatione pro equis portionibus omnes proventus memorate ecclesie percipiant et habeant Eligent autem dicti vicarii communiter sibi procuratorem annuum ad proventus illius ecclesie colligendos et conservandos et inter eos fideliter distribuendos De cuius procuratoris electione si forte inter se dissentiant per nos vel successorem nostrum procurator eius constituetur Si qui vero memoratorum vicariorum in officiis suis negligentes et desides inventi fuerint et super hoc in capitulo conventi se non emendaverint primo per subtractionem huius beneficii puniantur ampliori pena si nec sic se emendaverint puniendi pro arbitrio nostro et capituli nostri Volumus etiam quod dicta ecclesia de Wodebr cum ministris suis et parochianis quieta sit et libera ab omnibus archidiaconalibus consuetudinibus et exactionibus sicut et ecclesie capituli beati Petri Exon Et ut hoc nostra donatio et provisio rata sit et firma in perpetuum permanent eam presentis scripti pagina cum sigilli nostri appositione una cum sigillo capituli beati Petri Exon corroboravimus Hiis testibus Anselmo thesaurario Henrico precentore Willelmo do Swindon magistro Henrico de Warewic magistro Hugone de Wilton magistro Milone magistro Rogero de Didesham canonicis Exon magistro Willelmo Paze Mauricio et Galfrido capellanis Gileberto notario et multis aliis