Charter Document - 03150177

Sanctissimo patri et domino U dei gratia summo pontifici I divina miseratione Exoniensis ecclesie minister humilis tam devotum quam debitum subiectionis obsequium cum salute Scitis pater sanctissime quomodo in Anglicana ecclesia diebus nostris per mortem beati T martyris pacem populo suo et salutem operatus est pacis auctor et salutis In cuius memoriam recens devotio et rei novitas in ecclesiis altaria super numerum et capellas in compitis erexit innumeras in quibus fervente questu fervebat obsequium Set processu temporis tepescente causa effectus intepuit adeo ut martyrem gloriosum hactenus non usquequaque debito veneremur obsequio qui in remotis mundi partibus apud exteras ut accepimus nationes propriarum ecclesiarum honore gaudet et patrimonio cum in gente sua et patria locum non habebat preterquam in alieno adhuc hospes in suo Merito itaque in gloriosi martyris honore et nomine specialis ecclesia apud suos construi debuit dotata uberius et venerabilibus personis ditata plenius unde velut a latere domini Cantuariensis totius Anglicane ecclesie et regni consilium procederet et prudentia Commodius autem prope Cantuariam gloriosi martyris nativitatis locum hoc fieri potuit ubi ob honorem et libertatem ut gregi suo parceretur pastor capiti non pepercit Hinc est quod venerabilis patris B nunc Cantuariensis archiepiscopi propositum approbantes desiderium eius desideranter amplectimur et commendamus non solum Anglicane ecclesie sed toti regno in Cristo loquor profuturum Eo etiam favorabilius est facti propositum quod predecessores eius sanctos patres Anselmum scilicet et Thomam adhuc in carne Cantuarie presidentes idem in desideriis habuisse didicimus Verum gloriosus protomartyr Stephanus quod in honorem eius preconceperant adscito sibi beati martyris Thome consortia opus maluit inchoari ut in commune factus honor magis eluceat dimidium toto munere maius habens Huius autem de benignitate et misericordia propositi pendet executio Nec apud sanctitatem vestram monachorum Cantuariensium patens improbitas locum inveniat qui martiri suo et patrono invident et locum et honorem quem potius sanguine suo si de pari vices responderint comparasse debuerant Nunc autem simplices prudentium consiliis soli omnium votis obviare non verentur timore trepidantes ubi non est timor in nullo enim venerabili collegio procurari scimus dispendium nisi forte detrimentum vocent sinistri interpretes religionis augmentum Nec clementie vestre auditu dignum ducimus quod maiores nostri in clero optimates in populo quod ipse regni princeps opus velit et approbet quod sancte Cantuariensi ecclesie iuri preiudicet deroget dignitati statum subvertat aut immutet Paternitati igitur vestre obnixe supplicantes universi rogamus attentius quatinus tam sancto proposito utili dato desuper vestra venerande pater patrocinetur auctoritas Et quod concurrentibus votis clerus predicat principi placet populus probat vobis ecclesie dei feliciter presidentibus in honore gloriosorum martyrum in opus transiens per vos et a vobis incrementum habeat et profectum Valeat sanctitas vestra in perpetuum