Charter Document - 03140360

Omnibus Christi fidelibus praesentis scriptum visuris vel audituris Willelmus Dei gratia Abbas Rameseiae salutem in Domino Sciatis nos tradidisse hominibus nostris de Hemyngforde manerium nostrum de Hemyngforde ad firmam a festo Sancti Michaelis anno regni Regis Edwardi filii Regis Henrici octavo incipiente nono usque ad exitum septem annorum proximo sequentium pro quadraginta libris sterlingorum nobis inde solvendis annuatim ad quatuor terminos scilicet ad festum Sancti Michaelis decem libris ad festum Sancti Andreae decem libris in Annunciatione Beatae Mariae Virginis decem libris et in Nativitate Sancti Johannis Baptistae decem libris Tenebunt itaque praedicti homines nostri praedictum manerium cum omnibus pertinentiis suis praeter donationem ecclesiae cum illam vacare contigerit et praeter piscariam nostram et molendinum quae in manu nostra retinuimus Habebunt etiam omnes proventus ipsius villae praeter talliagia nostra et praeter auxilium vicecomitis hundredi et praeter wardpenys et scutagium domini Regis et praeter exitum causarum illarum quae sine nobis vel ballivis nostris terminari non poterunt de quarum exity habebunt medietatem et praeter visum franciplegii et praeter acram mandati et acras Praepositi Rameseiae Et sciendum quod si aliquis custumarius sine herede de progenie sua exeunte decesserit nos tradamus terram suam et mesuagium suum cuicunque voluerimus et gersumam inde provenientem penes nos retinebimus Nullus etiam custumarius finem faciat pro filiabus suis alleviandis vel maritandis absque nostra praesentia sed coram nobis fiant gersumae earum praesentibus praepositis vel aliquibus de firmariis quo dictam pecuniam habeant et colligant versus firmam suam Nec licebit dictis firmariis aliqui extraneo seu de alieno homagio domum vel terram tradere sine licentia nostra speciali Volumus enim quod hujusmodi gersumae ultra certam firmam nobis integre persolvantur Receperunt autem dicti firmarii tale implementum Grangia frumenti plena frumento ex utraque parte hostii per postes hostii et per trabes ultra hostium et sic indirectum usque in summitatem grangiae Receperunt etiam horreum avenae plenum avenae per postem hostii versus orientem Latitudo autem grangiae erat viginti octo pedum intus Longitudo triginta novem pedum Et ipsa grangia rotunda erat versus orientem Altitudo vero in medio novemdecim pedum In latere vero ab hostio usque ad uncium rotunditatis erat longitudo parietis triginta pedum Receperunt etiam tassum hordei longitudinis triginta sex pedum latitudinis undecim pedum altitudinis undecim pedum in latitudine in medio octodecim pedum Quieti autem erunt de serviente in autumno singulis annis praeterquam in ultimo autumno in quo habebunt servientem per cujus visum secundum consuetudinem abbatiae fiet implementum Quieti etiam erunt de hospitio nostro annuo et debito excepto eo quod quotienscunque ibi venerimus invenient nobis sal stramen et fenum sine compoto Finitis vero septem annis reddent nobis praedictum manerium cum tali implemento cum quali illud receperunt Reddent etiam terram bene bis aratam Et sciendum quod fructus qui tunc fuerunt in horreo computari debent pro primo anno quia fuerunt de nostro implemento In hujus siquidem traditionis terrae et manerii testimonium praesenti scripto sigillum nostrum fecimus apponi