Charter Document - 03060589

Excellentissimo domino suo Henrico Dei gratia illustri Regi Angliae domino Hibernie [] Capitulum ecclesie Landavensis salutem in domino sempiternam et orationes in Christo cum devotione Defuncto bone memorie Johanne quondam Landavensi episcopo nobis de solita clementia vestra per literas vestras patentes liberam vestri gratia concessistis eligendi facultatem Nos autem Deum habentes pre oculis salubri concilio literarum vestrarum firmiter ut decuit inherentes invocata Spiritus Sancti gratia de unanimi assensu et voluntate omnium fratrum nostrorum magistrum Willelmum de Radnore thesaurarium nostrum virum discretum et honestum egregie literatum Deo et ecclesie devotum regie majestati vestre humiliter inclinatum et rei publice per Dei gratiam valde profuturum in temporalibus cautum in patrem elegimus et pastorem celsitudini vestre quam conservet et augeat Altissimus humiliter supplicantes et devote quatinus dicte electioni nostre regium assensum pie prebere dignemini Nec moleste ferre velitis si placet quod preces vestras ad presens exaudire nequivimus Cum ille qui nunc instinctu Spiritus Sancti duximus eligendum a puerili etate sua nobis cognitus existit et inter nos laudabiliter et continue conversatus fuerit in ecclesie nostra que semper clericos de gremio suo cujuslibet ecclesie dummodo digni extiterint in electionibus celebrandis ceteris clericis duxit preferendos Propter quod devotissime petimus ne predicto facto nostro quod ut speramus a Deo processit in aliquo quod Deus avertat moveri aut turbari velitis sed potius si placet processui nostro canonico congratulari dignemini Valeat et crescat regia potestas vestra semper in domino Datum anno domini MCCLVI v Kal Aug