Charter Document - 03060580

Universis Christi fidelibus presens scriptum visuris vel audituris Frater B[onifatius] dictus abbas Cisterciensis totusque conventus abbatum capituli generalis rei geste noticiam cum salute Universitati vestre presentibus innotescat quod nos sententiam a venerabilibus coabbatibus nostris de Bildewas de Bruera et de Kyngeswode judicibus a capitulo generali constitutis in causa que vertebatur inter abbatiam de Margan ex una parte et abbatiam de Kerlyon ex altera rite ac judicialiter latam prout inferius continetur partibus presentibus ac consentientibus auctoritate dicti capituli duximus roborandam Omnibus sancte matris ecclesie filiis presens scriptum visuris vel audituris de Bildewas de Bruere de Kyngeswode abbatibus salutem in domino sempiternam Quoniam quecumque a mortalibus geruntur nisi ad posterorum memoriam litterarum diligentia scripto commendentur ceca oblivione perire dinoscuntur universis presentibus et futuris que per nos auctoritate capituli generalis inter domos de Margan et Kerlyon Sentencialiter terminata sunt presenti scripto propalare decrevimus Cum enim ad peticionem abbatis de Margan dati fuissemus judices a capitulo generali super communa pasture de Hyrwenworgan unde nobis liquido constabat per retroacta alias hinc motam fuisse questionem et eandem amicabili concordia per compositionem inter partes factam fuisse sopitam Sed eam postea ex parte dictorum abbatis et conventus de Kerlyon minus integre observatam Nos convocatis rite partibus in ecclesia cathedrali Wygornie anno domini MCCL tercio feria secunda post clausum Pasche propositis utrimque proponendis testibus admissis et attestacionibus puplicatis cartis et scriptis inter partes confectis lectis et sane intellectis assidentibus nobiscum venerabilibus patribus de Dora de Tinterna abbatibus necnon et aliis discretis nostri ordinis personis dictam controversiam auctoritate capituli generalis qua fungebamur in hac parte per sententiam diffinitivam cum nullatenus licet per nos plurimum esset elaboratum amicabilem posset finem sortiri hoc modo terminavimus Primo scilicet irrefragabiliter censuimus compositionem inter dictas domos anno domini MCCIII de dicta pastura et possessionibus aliis factam perpetuis fore temporibus inviolabiliter observandam Secundo quod abbas et conventus de Margan dicta pastura de Hyrwenworgan omnibus anni temporibus die no[c]tuque ubique libere et pacifice cum omni genere animalium utantur Et ut litis in posterum tollatur occasio dicte commune terminos per has divisas facta prius inde diligenti inquisicione per viros religiosos et fidedignos duximus h[oc modo de]clarare videlicet a magna pola ubi Wrelech oritur per aquam de Wrelech tendendo usque in fluvium de Neth versus septemtrionem et per fluvium de Neth tendendo versus orientem usque ad Redevayn et a Re[devayn] usque ad fines Breconie et inde versus austrum tendendo usque ad rivulum Canan et per rivulum Canan usque de Aberdar et ab Aberdar directe versus occidentem usque ad Puthladar et a Puthladar usque ad cilium montis et per cilium montis directe tendendo versus occidentem usque ad predictam magnam polam Quicquid infra hos terminos continetur dictis abbati et conventui de Margan in communem pasturam adjudicavimus exceptis mansioni et bosco de Bolchoyth et centum acris eidem mansioni contiguis in loco dumtaxat abbati et conventui de Margan minus nocenti et unica tantum domo apud Estunwrelech in qua nullus maneat religiosus nec aliqua ibi excepta tantum trium acrarum quantitate circa eandem domum fiat clausura Tercio quod sepes fossata clausure et alia quelibet edificia per ipsos de Kerlyon constructa preter prenominata penitus amoveantur Quarto et ultimo quod si aliquis monachus vel conversus dictorum domorum contra hanc sententiam venire presumpserit sine omni excusacione et dilacione a[u]ctoritate ordinis a domo propria penitus emittatur non reversurus nisi de licentia capituli generalis Et ut hec sentencia diffinitiva firmitatis robur optineat imperpetuum nos eam in scripto redactam sigillorum nostrorum impressione roboravimus Antedictis vero judicibus committit iterato capitulum generale eisdem firmiter injungendo ut sicut in dicta causa super principali laudabiliter processerunt ita super accessoriis videlicet super expensis factis et dampnis illatis domui de Margan ejusdem auctoritate capituli juris ordine observato procedant prout fuerit procedendum facientes quod decreverint per censuram sordini irrefragabiliter observari Quod si omnes hiis exequendis interesse non poterint duo ea nichilominus fideliter exequantur Datum Cistercii anno domini MCCLIII tempore capituli generalis