Charter Document - 03055188

Johannes Dei gratia Glasguensis Episcopus omnibus Sancte Matris Ecclesie filiis ad quos presens scriptum pervenerit salutem in Domino sempiternam Cum inter nos et Rectores Ecclesiarum de Anand de Loughmaban de Cumbertres de Gretenhou de Raynpatrick et de Kirkepatrik ex parte una et Dominos Radulphum Priorem et Conventum Giseburne ex parte altera orta fuit controversia super intolerabili diminutione portionum ad eosdem Rectores secundum ordinationem predecessorum nostrorum spectantium eoque ex eisdem secundum quod asserebant congrue sustentari et onera debita et consueta sustinere non possent tandem de consensu Capituli nostri Glasguensis pro nobis et predictis Rectoribus ac nostris et eorum successores similiter et pro prefatis Priore et Conventu eorumque successores sopitis et sopiendis hujusmodi controversiis inperpetuum coram nobis concordatum est provisum et expresse consensum est in hanc formam Videlicet quod omnes decime garbarum bladi ad predictas Ecclesias et earum Capellas de terris cultis et colendis in campis et ortis qualitercunque spectantes memoratis Canonicos et eorum successores sine diminutione qualibet vel derogatione cum areis et terris ad eosdem pertinentibus secundum quod in autenticis predecessorum nostrorum continetur ad eorum usus proprios reserventur Cetera vero omnia ad ipsas Ecclesias spectantia cum terris residuis Ecclesiarum et decimis earundem terrarum cedant in usus Rectorum ipsarum Ecclesiarum qui pro tempore fuerint cum hiis tamen additamentis per manus predictorum Canonicos seu procuratorum eorundem ad predictorum Rectorum sustentationem et onerum subportationem plenarium infra suas parochias certo loco et competenti eisdem annuatim solvendis videlicet Rectori Ecclesie de Anand quadraginta solidis sterlingorum Rectori Ecclesie de Loughmaban sex marcis sterlingorum qui scilicet sumptibus suis Capella de Rokele per Capellanum ydoneum modo debito et consueto faciet de serviri Rectori Ecclesie de Cumbertres duodecim skeppis farine Rectori Ecclesie de Gretenhou duodecim skeppis farine Rectori Ecclesie de Rainpatrick decem skeppis farine Rectori Ecclesie de Kirkepatric decem skeppis farine qui scilicet Rector sumptibus suis Capelle de Logan per Capellanum ydoneum modo debito et consueto faciet de serviri Quas scilicet pecuniam et firmam singuli eorum per equales portiones ad duos anni terminos percipient medietatem scilicet ad festum Sancti Martini in hyeme et medietatem aliam ad Pentecosten Quilibet etiam predictorum Rectorum in prima sui institutione liberam habebit optionem an portiones prescriptas modo predicto an certam numerate pecunie summam suo perpetuo recipere maluerint Istorumque duorum quodcunque semel preelegerit hoc ipsum suo perpetuo incunctanter tenebit aliudque repetere ei nullatenus licebit Si autem eorum aliquis numeratam pecuniam preelegerit portio totalis ipsum contingens exceptis tantum modo edificiis et ortis propriis penes Canonicos memoratos residebit idemque Rector in sue institutionis exordio sacro sanctis evangeliis inspectis juramentum corporale prestabit quod nulla fraude seu malo ingenio super hujusmodi portionis penes Canonicos residentis integra perceptione detrimentum vel impedimentum faciet seu fieri procurabit quin potius diligentiam et executionem ecclesiasticam cum interpellatus fuerit fideliter adhibebit ut hujusmodi portio in usum et commodum predictorum Canonicos plenaria cedat sicut eandem portionem percipere debuisset Summa autem pecunie quam eorum quilibet eligere poterit in singulis Ecclesiis hoc est in Ecclesia de Anand triginta tres marce in Ecclesia de Loughmaban triginta et octo marce in Ecclesia de Cumbertres decem et octo marce in Ecclesia de Gretenhou decem et octo marce in Ecclesia de Rainpatrick decem et octo marce in Ecclesia de Kirkepatrick decem et octo marce Et quia Ecclesiarum predictarum facultatibus diligentius ponderatis prescriptas portiones aut pecunie numerate summas predictas ad predictorum Rectorum sustentationem et onerum subportationem sufficere comperimus nos Capitulo nostro Glasguensi consensum prebente pro nobis et successores nostris predictos Rectores eorumque successores prefatis portionibus vel summis pecunie prenominatis inperpetuum debere fore contentos in onerum sustentationem et quocunque casu qualitercunque contingente episcopali auctoritate decrevimus quod si in posterum eorum aliquis contra hanc provisionem aliquid attemptare presumpserit ipsum nulla tenus audiendum set perpetuum eidem silentium imponendum fore statuimus Rectores quoque predicti qui pro tempore fuerint nobis et successores nostris de episcopalibus omnibus respondebunt et omnia onera ipsarum Ecclesiarum sustinebunt Rectores vero Ecclesiarum de Anand et de Loughmaban Canonicos memoratis pecunie summam in autenticis predecessorum nostrorum contentam ad eorundem Canonicos usum et luminarium [Ecclesie] Glasguensis supplementum terminis statutis sine dilatione qualibet vel contradictione persolvent Quod si aliquando facere noluerint nos eosdem ad solutionem dictarum quantitatum quotiens necesse fuerit compellamus Canonici vero predicti et eorum successores decimas garbarum bladi supradictas omnes et singulas perpetuis temporibus et portiones Rectorum quorumlibet qui pecuniam numeratam sicut predictum est preelegerint quamdiu penes ipsos residebunt pro voluntate sua libere disponent et ordinabunt et commodum suum sicut eis placuerit quoad dicti Rectores vixerint et dictas portiones pecuniarias tenuerint omnimodo facient Ut autem hec nostra provisio a Capitulo nostro Glasguensi et a prefatis Rectoribus et a Canonicis supradictis in presentia nostra constitutis concessa et approbata firma et illibata inperpetuum permaneat huic scripto in modum cirographi confecto nos sigillum nostrum et sigillum Capituli Glasguensis ex parte una fecimus apponi et predicti Prior et Conventus sigillum Capituli sui apponi fecerunt ex altera Acta sunt hec anno gratie millesimo CC sexagesimo quinto octavo Idus Julii