Charter Document - 03051199

Pateat universis quod nos Willelmus Prior Gyseburne et ejusdem loci Conventus vij Idus Julii anno gratie MCC octogesimo primo domino Adam quondam Priori nostro qui Prioratus officio sponte cessit provisionem perpetue sustentationis fecimus in hac forma In primis concessimus eidem cameram honestam scilicet infirmarie conjunctam ad quam idem cum esset Prior divertere consuevit hac tamen adhibenda per ipsum diligentia ut per nimiam aut indiscretam advocationem secularium Fratres ad infirmariam causa infirmitatis vel solatii declinantes nullatenus perturbentur Alioquin si intolerabiliter secus acciderit nos eidem aliam cameram satis honestam assignabimus Cumque in Conventum introire placuerit quamcumque partem preelegerit volumus quod habeat primum locum ab omnibus singulari reverentia honorandus Concessimus etiam ei Canonicum in socium assiduum et ministrum quos ambos ab omni subportatione onerum nisi mere voluntaria exhonorari permittimus excepto quod in solemnitatibus nisi infirmitate vel alia causa legitima fuerint prepediti in matutinis magnis missis et vesperis interesse tenentur in divinis officiis secundum quod status suos condecet ministraturi si tamen hora competenti fuerint per Cantorem super ministeriis premuniti Quibus victualia cotidiana sicut duobus majoribus de Conventu cum adjectione unius pitantia competentis in prandio Et cum ipse cenare voluerit honeste exhibitionis tam de coquina quam de cellario volumus ministrari excepto quod in festis principalibus in quibus ex more quatuor fercula Conventui apponuntur sufficiet eis hujusmodi abundantia cum Conventu Concessimus etiam ei unum servitorem secularem cui volumus robam sicut scutariis Prioris et victualia prout status suus postulat exhiberi Que autem in mensa sua supererunt per Elemosinarium nostrum in usus pauperum convertentur si tamen idem Adam voluerit plerumque ex sibi appositis indigenti alicui ratione sue paupertatis portionem transmittere nolumus quod hoc ei per Elemosinarium denegetur Ordinamus etiam quod idem Adam singulis annis recipiat novam tunicam et novum pellicium sicut Prior cetera quoque vestimenta atque calciamenta prout indiguerit et condecet statum suum Socius autem suus vestimenta et calciamenta recipiat sicut quilibet de Conventu Novis vero supervenientibus vetera restituendo proicient pauperibus eroganda Concessimus etiam ei quod infra septa Monasterii valeat cum socio suo non petita speciali licentia spatiari set si voluerit egredi licentiam a Custode Ordinis petere debeat cui petituro nolumus cum difficultate aliqua responderi dum tamen petitio licita fuerit et honesta Ad hec tamen licuerit ei amicos suos remotiores personaliter visitare Volumus quod per liberationem Bursarii ad nutum Prioris iiij evectiones accipiat de communi Permittimus insuper quod ei decem marcas annuatim per Bursarium curialiter offerantur de quibus si ipsas receperit cum ad partes remotas pro visitandis amicis exierit expensas rationabiles faciet residuum autem in usus Monasterii utiles et honestos convertet super quibus suam conscientiam oneramus In testimonium autem hujus provisionis per nos ordinate et approbate per eundem Adam ac ratificata per venerabilem patrem dominum Willelmum Ebor Archiepiscopum Anglie Primatem sigillum ejusdem patris utrique parti hujus scripti in modo cyrographi confecti et sigillum Capituli nostri uni parti ejusdem et sigillum ejusdem Adam alteri sunt appensa Dat[um] apud Gyseburne die et anno superius memoratis