Charter Document - 03051198

Ad fervorem devotionis et regularis observantie in Collegio de Gyseburne salubrius et sanctius observandum nos Willelmus Dei gratia Ebor Archiepiscopus Anglie Primas x Kalendas Martii Anno Domini MCCLXX nono ad predictum locum inquisitionis et visitationis gratia accessimus transgressus et vitia inibi correcturi et ibidem comperta placentia in Cristo pro viribus firmaturi Ad cujus loci prosperitatem et pacem post visitata inquisita diligentius et inventa sic in Dei nomine processimus statuendo In primis igitur ad decus et observantiam vere devotionis et obedientie injungimus et districte precipimus quod regula Beati Augustini et salubria statuta predecessorum nostrorum et nostra debite et devote observentur quatenus regularem pretendunt et innuunt honestatem Item quod post officium completorii pretextu hospitum vel alias nullus extra claustrum causa lascivie vel bibendi aliquo modo exeat vel moretur nisi presente Priore et de licentia et precepto Presidentis vel de itinere redierit velut hospes Item scolas onerosas divitum et prepotentum scolarium et etiam indigentium prorsus prohibemus nisi quatenus Cancellarius noster Ebor eas ad fructum et utilitatem Monasterii evidentius acceptavit Item precipimus sub obtestatione extremi examinis quod infirmi fictitii in infirmariam nullatenus admittantur sed qualitercumque ibidem introgressi tanquam simulatores et regulam pervertentes inflictis penis seu penitentiis expellantur Item volumus quod infirmi graviter infirmati majori compassione spiritus procurentur et quod nulli nisi graviter egrotantes in infirmariam aliquatenus admittantur necnon et quod infirmaria deinceps ab extraneis decentius custodiatur Item quia infirmaria ad recreationem languentium non autem ad dissolutionem vel ingluviem a sanctis patribus est provisa inhibemus ne Willelmus de Beverlaco Stephanus de Kirkeby Willelmus de Scelton Walterus de Stocton quos in infirmaria suspecta conventicula dissolutiones et obloquia fecisse comperimus ad solamen vel recreationem infirmarie in quam irreverenter et nequiter deliquerunt deinceps admittantur nisi de nostra licentia speciali Item volumus quod extra septa claustralia non exeant qualitercumque Item volumus et ordinamus quod in refectorio omnes eque communibus cibariis gaudeant et vescantur Item precipimus quod elemosina a consumptoribus et ribaldis rite et districtius conservetur Superfluam etiam familiam intus et extra et maxime onerosam et incontinentem statim precipimus amoveri Item injungimus quod silentium sanctius solito observetur et quod nullus in choro in Dei laudibus obmutescat sed vel psallat ex corde aut corpore mox recedat et volumus quod per Rectores chori et sibi astantes utrobique protinus expellatur nisi ipsum gravis et vera infirmitas excusaret Item injungimus sollicite coram Cristo ne in incessu solatii aliqua scurrilia vel turpia proferantur sed potius que prosint et edificent ad salutem Item in compotis reddendis volumus quod juvenes subtiles et sensati de quibus spes sit fructifere pullulandi intersint et clare percipiant que aguntur Item parietes cujuslibet dissensionis et discordie et confabulationes suspectas sub indignatione Omnipotentis Dei et sub pena anathematis de cetero prohibemus et maxime ne quis in proclamationibus quemquam de sociis tueatur sed pro se solo quilibet respondeat et loquatur Reluctantes enim huic sancte monitioni nostre sic punire proponimus quod puplice per Dei gratiam nostra cedet ceteris punitio in terrorem Item prohibemus ne quis Canonicorum absque precepto Presidentis munera recipiat a quocumque et si quicquam de licentia vel precepto superioris receperit in communem usum mox per Presidentis industriam assignetur Item vagos et illicitos discursus Canonicorum extra curiam et infra deinceps firmiter inhibemus nisi quatenus regula et ordinata licentia permiserit spatiandi Item volumus quod laici quicumque fuerint qui circa maneria custodienda suspecte et celeriter ditantur statim amoveantur omnino Volumus etiam quod Conversi discreti in tractatibus temporalium sepius advocentur ne eorum utilis sagacitas contempnatur Item injungimus Priori in virtute obedientie et professionis sue ne in correctionibus faciendis se amodo erga quoscumque remissum exhibeat vel quod absit aliquatenus timor osum sed gregem sibi commissum tanquam prelatus prospiciens et providus crebro instruat et informet et nunc ad spiritualia nunc ad temporalia intuitum dirigat et coaptet Item precipimus quod Subprior circa confessiones audiendas et que ipsius multipliciter incumbunt officio ita morigeratum et moderatum ita sagacem et sollicitum se exhibeat ut in extremo judicio placida retributio sibi fiat Item firmiter et districte prohibemus ne pretextu perverse et perniciose conspirationis sue seu dissensionis sue quam jugiter procurare consueverant in Collegio Willelmus de Beverlaco Stephanus de Kyrkeby Willelmus de Scelton Walterus de Stocton et Johannes de Salkoc qui in quibusdam se inhoneste habuerunt in nullis omnino ministeriis seu officiis morari seu profici permittantur donec meritis suis exigentibus aliud de eisdem duxerimus ordinandum quos velut claustrales simplices Conventumque sequentes correctioni et conscientiis Prioris et Subprioris sub periculo gradus sui adeo deputamus ne iidem Prior et Subprior pro commissis et transgressionibus eorundem penas condignas et equales sicut ordinaveramus acerbe subeant cum eisdem Item precipimus sub testimonio Crucifixi ne quisquam casui vel ruine alterius congaudeat vel improperet quoquomodo se veram compassionem pretendat cum tremore cordis de se ipso simile pertimescens Item volumus quod hec in capite cujuslibet mensis in pleno capitulo puplice recitentur et quod absque reluctatione qualibet ab omnibus et singulis sub vinculo et virtute professionis facte firmiter observentur ita quod nos non oporteat spirituales aculeos protervius extendere in quemcunque