Charter Document - 02969524

Nouerint uniuersi sancte matris ecclesie filii ad quorum noticiam peruenerit hec scriptura quod cum nos frater Rogerus abbas Oseneye et eiusdem loci conuentus Lincolniensis diocesis essemus venerabili patri in Cristo domino Godefrido dei gratia episcopo Wigorniensi pro nobis et successoribus nostris per nostras litteras obligati ad inueniendum eidem suisque successoribus unum hospicium annuum quoad omnes sumptus infra scepta monasterii nostri supradicti racione ecclesie de Beyburia de patronatu ipsius domini Wigorniensis episcopi existentis quam optinuimus ab antiquo et tenemus in usus proprios concessam in qua et in aliis ecclesiis consimilibus quibuscumque religiosis apropriatis episcopus Wigorniensis qui pro tempore fuerit de consuetudine hactenus optenta et approbata diucius in sua diocesi ex cura pastorali que sibi incumbere dinoscitur visitacionis officium per se uel per suum officialem annis singulis licite poterit exercere hospiciumque huiusmodi sub forma predicta idem dominus episcopus Godefridus per tempus non modicum a nobis absque rebellionis seu contradiccionis obstaculo habuisset demum prefato episcopo Godefrido pridie Idus Aprilis anno domini MCCLXXX quinto in dicto monasterio nostro apud Oseneyam existente personaliter et habente ibidem suum hospicium quod a nobis ei ut premittitur debebatur idem dominus episcopus ad nostram instanciam et rogatus frequenter pro se et suis successoribus ipsum hospicium loco predicto uidelicet apud Oseneyam optinendum pro quatuor marcis annuis eidem episcopo et suis successoribus in dicto manerio de Beyburia in festo Annunciacionis dominice integraliter exsoluendis in releuamen oneris quod domus nostra prout sibi fecimus id exponi ex multitudine confluente ad eum multocies sustinebat graciose remisit Ob quod Godefrido episcopo sepedicto et successoribus suis de solucione dictarum quatuor marcarum in dicto termino ex causa premissa annis singulis facienda plenam securitatem parare uolentes tenore presencium profitemur quatuor marcas eidem domino Godefrido Wigorniensi episcopo et suis successoribus perpetuis temporibus pro remissione huiusmodi per nos post diligentem tractatum habitum super hoc communiter in capitulo ex certa consciencia et consensu unanimi fuisse concessas quas loco et termino memoratis balliuo episcopi Wigorniensis nomine apud Beyburiam commoranti nos mittimus absque impugnacione qualibet annis singulis soluturos Et si forsan in solucione huiusmodi in quemcumque rei euentum deficere nos contingat tunc fructus ecclesie nostre de Byburia predicte liceat episcopo Wigorniensi qui pro tempore fuerit auctoritate sua sub arto tenere sequestro ne quis nostro nomine ad eos manus apponat quousque dicte quatuor marce eidem episcopo sine diminucione qualibet exsoluantur In cuius rei testimonium et memoriam sigillum nostrum commune hiis litteris est appensum Datum et actum in capitulo nostro apud Oseneyam in festo sancti Luce Euangeliste anno domini MCCLXXX quinto