Charter Document - 02964742

Edwardus dei gracia rex Anglie dominus Hibernie et dux Aquitannie venerabili in Cristo patri I eadem gracia episcopo Lincolniensi salutem Monstrauit nobis abbas de Oseneye quod cum ipse nuper implacitauerit Walterum personam ecclesie de Thornetone vestre dioecesis ut dicitur in curia Christianitatis coram Officiali vestro Lincolniensi de quibusdam decimis prouenientibus de tenementis infra limites parochie predicte ecclesie de Thornetone situatis et eidem abbati debitis ac libere capelle sancti Georgii infra castrum nostrum Oxonie et predecessoribus eiusdem abbatis per Robertum de Olleyo quondam patronum ecclesie predicte de Thornetone et fundatorem capelle predicte sancti Georgii sufficienti titulo a tempore quo non extat memoria assignatis quibus dictus abbas per prefatum Walterum se spoliatum fuisse asserebat Malculinus de Chastilon processum dicti placiti coram predicto officiali inchoati impedire fraudulenter et maliciose machinans ac asserens ipsum Walterum tenere ecclesiam illam de aduocacione ipsius Malculini et quod dictus abbas clamans quartam partem eiusdem ecclesie de aduocacione sua propria traxit eum inde in placitum coram predicto officiali in curia Christianitatis quoddam breue de prohibicione ne placitum inde teneret in curia Christianitatis a cancellaria nostra predicto officiali dirigi procurauit in predicti abbatis dispendium non modicum et grauamen ac retardacionem iuris eiusdem abbatis et libere capelle nostre predicte manifestam uolentes igitur per uos certiorari plenius in hac parte utrum predicte decime predicto abbati et predecessoribus suis ac capelle nostre predicte ut predictum est date annuum ualorem quarte partis predicte ecclesie de Thornetone attingant vel excedant necne uobis mandamus quod super premissis nos distincte et aperte sine dilacione reddatis certiores ut ulterius inde fieri faciamus quod iustum fuerit atque rationis Teste me ipso apud Langele xiiii die Iunii anno regni nostri secundo