Charter Document - 02949901
| Charter Number: | 02949901 |
|---|---|
| Cartulary Title: | The Coucher Book of Selby |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1240 |
| Date type: | Internal, Calendar, Papal |
| Resource Link(s): |
|
Charter:
Gregorius episcopus servus servorum Dei dilectis filiis priori et conventui Dunelm salutem et apostolicam benediccionem Ecclesiam vestram tanquam devotam nobis propensius diligentes in hiis libenter quantum cum Deo possumus annuimus votis vestris que a nobis pro ampliando Divini nominis cultu et pietatis operibus exercendis pie ac humiliter postulatis Cum igitur conventum vestrum cupiatis ut asseritis vicenario monachorum numero adaugere nos ut desiderium vestrum implere possitis facilius in hac parte ac hospitalitatis operibus abundantius imminere vestris supplicacionibus inclinati ecclesiam Sancti Petri de Houeden Ebor dioecesis ad presentacionem vestram spectantem in qua eciam tu fili Prior jus Archidiaconatu racione prioratus nosceris optinere ob causas premissas vestris usibus deputamus devocioni vestre auctoritate presencium concedentes ut possessiones ejusdem ecclesie cum ipsam vacare contigerit liceat vobis pro eisdem usibus ingredi et tenere proviso quod in ea statuatur perpetua vicaria ad quam loci dioecesano instituendus ydoneus vicarius presentetur cui de ipsius ecclesia proventibus pro consuetis et debitis serviciis et oneribus supportandis congrua porcio signetur Nulli ergo hominum omnino liceat hanc paginam nostre concessionis infringere vel ei ausu temerario contraire Si quis autem hoc attemptare presumpserit indignacionem Omnipotentis Dei et beatorum Petri et Pauli Apostolorum ejus se noverit incursurum Data Laterani viij kalendas Augusti pontificatus nostri anno quarto decimo