Charter Document - 02870084

Capitulo nostro Rypon salutem graciam et benediccionem Dudum apud vos videlicet die Lune proxima post festum Sancti Michaelis Anno gracie MCCC primo facta convocacione fratrum prout moris est auctoritate mandati nostri vobis directi in vestro capitulo visitacionis officium excercentes inter cetera comperimus tunc ibidem quod ecclesia parochialis Rypon ab olim in sex porciones curam animarum habentes annexam notorie est divisa quodque annexo onere residencie personalis sex constituunt porcionarii in eadem certis ad communam reditibus assignatis quos non residentes percipiunt ac si personaliter residerent Comperimus eciam nullum ipsorum inibi residere nec quemquam eorum perpetuum habere vicarium [qui] pro se curam gereret animarum Unde ne culpam alienam propriam faceremus dissimulando quod absit et ad statum debitum reducere volentes que in premissis reformacione precipua novimus fore digna vobis [] capitulo per nostras literas quas sub dat iij Non Octobr anno predicto recepistis mandavimus quod auctoritate nostra omnes porcionarios hujusmodi qui se gerunt pro canonicis in ecclesia memorata moneretis legitime et efficaciter induceretis et monuimus eciam nosmet ipsi ut ipsi omnes et singuli citra quadragesimam proxima tunc instantem ad residendum in prefata ecclesia Rypon personaliter se aptarent sub comminacione canonica literis ipsis inserta Et licet postmodum per vestrum certifica torium quod penes nos residet et alias notorie nobis constaret quod nullus penitus dictorum sex porcionariorum se citra tempus predictum vel hactenus ad residendum se aptavit nisi dominus Rogerus Swayn qui non est de numero eorundem set ejus porcio de novo creata extra prefatam ecclesiam Rypon in ecclesia parochiali de Stainwigges annexo onere supradicto consistit et quod ob eorum non residenciam multa utilia in decreto visitacionis nostre vobis relicto contenta redduntur neglecta in elusionem mandati nostri hujusmodi non sine nota inobediencie et contemptus propter quod possemus inobedientes canonice punivisset Nos tamen mansuetudinem rigori preferre et dictos inobedientes ad bonum obediencie in visceribus caritatis tractare volentes vobis mandamus quatinus lecta puplice literarum serie tam in ecclesia quam in capitulo vestro Rypon assistentibus cotidianis ministris ejusdem auctoritate nostra moneatis iterato et legitime prefatos sex porcionarios et citetis peremptorie quos ex abundanti monemus tenore presencium et citamus quod infra tres menses a recepcione presencium ad prefatam ecclesiam Rypon accedant facturi in ipsa residenciam ad quam tenentur ut premittitur personalem sub pena canonica quam contra non parentes ex tunc curabimus exercere quem terminum habito respectu ad monicionem eis jam prius factam sufficientem et diffusum merito reputamus et propter periculum quod imminet animarum eis precisum et peremptorium assignamus omnes fructus et proventus ad communam vestram spectantes ex nunc certis de causis et legitimis tenore presencium in vestris manibus sequestrantes De die vero recepcionis presencium monicionis eciam et citacionis et nominibus tam parencium quam non parencium monicioni et citacioni predictis citra lapsum trium mensium predictorum et quicquid feceritis in premissis nos distincte et aperte certificare curetis per vestras patentes literas harum seriem continentes Valete Dat apud Cawod v Idus Novembr Anno gracie MCCC secundo et pontificatus nostri tercio