Charter Document - 02870011
| Charter Number: | 02870011 |
|---|---|
| Cartulary Title: | Memorials of the Church of SS. Peter and Wilfried, Ripon |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1266 - 1279 |
| Date type: | Assigned |
| Resource Link(s): |
|
Charter:
Walterus permissione [] dilectis in Christo filiis capitulo Rypon salutem Nostis quomodo nos et ceteri prelati regni Anglie nuper apud London congregati urgentem ingentemque necessitatem domini nostri regis et Edwardi primogeniti sui in Terre Sancte subsidium proficiscentis pia prout decuit affeccione pensantes ad preces et instanciam ipsorum manus eorundem aliter evadere non valentes vicesimam bonorum nostrorum temporalium et tenencium omnium ecclesiarum nostrarum concessimus in usus dicti domini Edwardi pro tam pio ejusdem proposito promovendo convertendam et ut ecclesiarum indemnitati prospiceretur et honori ne bona earumdem per manus laicas seu regales ministros qui improbe forte lascivia rentur in eisdem et manus extenderent ad vetita in prejudicium ecclesiastice libertatis temere diriperentur hoc pro remedio providimus ex adverso quod dicta vicesima non per ipsos sed per nos et nostros ministros qui temperatius procedent in eadem colligatur Cesset ergo metus ille per quem libertates vestras et privilegia offendi pertimescitis in hac parte quibus si quomodo libet per hoc prejudiciari posse perpenderemus nostra tanquam ille cujus principalius interest ad resistendum cornua prono animo erigere curaremus sed quanto regali munificencia majoribus estis libertatibus donati tanto prompcius et favorabilius pro tam pia maxime causa et regali egestate relevanda manus vos porrigere decet adjutrices a quo vos relevare non possumus Deus scit eciam si vellemus sed nec petitas a vobis inducias usque adventum nostrum in partes illas vobis concedere possumus cum ad curiam in proximo reversuri partes Eboracensis per magnum tempus appropinquare nequeamus et pecuniam predictam tali acceleracione colligi oporteat quod in instanti festo Purificacionis parata sit cum thesauro dicti domini Edwardi ad ipsum sine ulteriori diffugio transmittenda Expedit igitur ut facientes de necessitate virtutem onus quod declinare non poteritis gratanter et absque murmure subeatis ut grates saltem de beneficio vestro reportare possitis
Source (click image below to view full size)
