Charter Document - 02849299

Universis pateat ad quos pervenerit hec scriptura Inter Capitulum Beati Johannis de Beverle ex parte una convenit et Rogerum de Faringdon auri fabrum servientem Willelmi de Farendon aurifabri civis Lond[oniarum] ex altera Quod idem Rogerus de argento et auro per capitulum predictum inveniendis et per dictum Rogerum prout necesse fuerit depurantis faciet prefato Capitulo unum feretrum novum longitudine quinque pedum et dimidie et latitudine unius pedis et dimidie et altitudinis proporcionate pro Beato Johanne patrono ecclesie de Beverle pulcrum aptum et ydoneum cum platis et columpnis de opere cementario et ymaginibus subtilis operis et decori pluribus pro ejusdem capituli voluntate aut paucioribus maioribus et minoribus in qualibet parte feretri collocandis et cum tabernaculis et pinnaculis partis anterioris et posterioris et aliis subtilitatibus feretro hujusmodi et ejus pulcritudini convenientibus ad artificium tamen spectantibus aurifabri ita videlicet quod idem Rogerus argentum vivum carbones et omnia alia que tam pro consolitanda quam operando et aliis pro fabrica seu construccione feretri fuerint necessaria suis sumptibus inveniet quocumque existant seu quocumque nomine vocentur preter argentum ad materiam feretri ut predicitur faciendam et aurum ad feretrum de aurandum Et si contingat quod ymago aliqua vel quodcumque aliud ad feretrum pertinens in opere vel in fabrica racionabiliter reprobetur illud quodcunque fuerit conflabit et iterum convenienter faciet nullam aliam mercedem exinde quam pro opere semel facto aliqualiter petiturus Et Capitulum predictum pro singulis platis columpnis ymaginacionibus et aliis circa feretrum operandis tantum eidem Rogero nomine salarii vel mercedis in pecunia numerata vel in massa ad equalitatem ponderis fideliter persolvet quantum singula per ipsum Rogerum operata antequam deaurata fuerint ponderabunt tenebitur tamen ex auro Capituli jam dicti ea postmodum deaurare nichil amplius exacturus ab eodem Capitulo jure convencionis quam pondus ut premittitur operandorum Promisit eciam idem Capitulum eidem Rogero quod si quod dampnum pro defectu solucionis vel argenti ad operandum incurrerit sibi pro dampno hujusmodi satisfaciet competenter Ad quam vero solucionem in pecunia numerata vel satisfaccione in massa eidem Rogero ut predictum est fideliter et absque scrupulo faciendo memoratum Capitulum obligavit se et successores suos in ecclesia predicta Dictus autem Rogerus promisit juramento suo corporaliter prestito quod premissa omnia singula ipsum respiciencia fideliter pro parte sua observabit faciet et tenebit quodque nullum aliud opus sine voluntate et consensu Capituli durante opere prefati feretri in se accipiet et assumet Et si Capitulum memoratum dampnum aliquod incurrerit pro defectu ipsius Rogeri promisit fideliter idem Rogerus dampnum hujusmodi dicto Capitulo in omnibus plenaria resarcire Invenitque ad maiorem securitatem Willelmum de Farndon auri fabrum et civem Londiniarum manu captorem qui manu cepit pro dicto Rogero in omnibus premissis quatenus eum contingunt qui eciam pro eo dicto Capitulo se obligavit et heredes suos ac executores suos et omnia bona sua mobilia et immobilia ubicumque fuerint inventa In quorum omnium testimonium huic scripto cirografato dictum Capitulum et predicti Rogerus et Willelmus sigilla sua apposuerunt Datis London xviij Octobris anno gracie MCC nonagesimo secundo