Charter Document - 02842166

Universis ad quos pervenerit notitia scripti presentis Johannes [] Salutem in auctore salutis Cum nos nuper dolentes et plangentes defectum et statum moderni temporis canonicorum et aliorum officialium et clericorum ecclesie Sancti Johannis Beverlacensis quantum ad residentiam canonicam tam a jure communi quam precipue ex constitutione seu ordinatione primaria Adelstani quondam Anglie regis illustris fundatoris ecclesie predicte Sancti Johannis notorie debitam que per multa retro tempora per inertiam seu incuriam tam superiorum quam inferiorum in desuetudinem deviam abiit et recessit eosdem canonicos ecclesie prelibate Sancti Johannis vocatis vocandis et diligenter auditis de plano que faciebant ad negotium universis Demum de eorundem canonicorum expresso consensu per ordinationem nostram in capitulo Beverlacensi ex officio nostro factam ad observantiam residentie rationabilis per viginti quatuor septimanas sub certa forma annis singulis faciende temporato continuitatis rigore reduxerimus equanimiter redivivam prout in instrumento super hoc confecto ac sigillo nostro et sigillo capituli ejusdem ecclesie Beverlacensis consignato plenius et expressius continetur Subsequenter ad reformationem status Prepositi Precentoris Sacriste Cancellarii et septem clericorum de Berefeld ejusdem ecclesie Beverlacensis quantum ad residentiam mores et alia secundum pristinam consuetudinem contingentia statum ipsorum similiter ex officio nostro ad salutem animarum suarum fideliter laborantes ac juxta naturam et qualitatem negotii contra ipsos hactenus incohati pro quiete ipsorum ad honorem Dei et consummationem negotii procedere intendentes ipsos Prepositum Precentorem Sacristam Cancellarium et memoratos septem clericos de Berefeld coram nobis per decretum et citationes legitimas in capitulo nostro Beverlacensi ad diem Lune proximam ante festum B[eati] Michaelis proximo preteritum peremptorie fecimus evocari ordinationem nostram super ipsorum residentia et aliis supradictis cum librando moderamine faciendam sub debito obedientie audituros et pariter suscepturos Quibus die et loco predictis Preposito Sacrista Cancellario et quatuor clericis de Berefeld vi[delicet] Magistro Johanne de Kancia Roberto de Crachalle Petro de Rudby et Roberto de Cruce coram nobis per se personaliter constitutis ac Osberto de Spaldington per Ricardum dictum Laurance et Willelmo Dandewe per Johannem de Lokyngtona procuratores suos legitime constitutos comparentibus coram nobis die et loco predictis nullo pro septimo clerico eisdem die et loco coram nobis aliqualiter comparente pro eo quod Canonici ejusdem ecclesie una voce unanimiter asserebant prefatum Sacristam ipso facto sibi percipere totum corrodium quod septimo clerico pro jure suo assignatum fuerat ab antiquo Iidem Sacrista Cancellarius et prenominat equatuor clerici de Berefeld sicut dictum est personaliter per se presentes ac Ricardus dictus Laurance et Johannes de Lokyngtona procuratores ut predicitur Osberti de Spaldyngton et W[] Dandewe clericorum de Berefeld tunc absentium et prefatus Cancellarius procurator legitimus Precentoris predicti quasi uno ore unanimiter et expresse consilio insuper et assensu dictorum canonicorum et Prepositi concurrente se secundum bonam fidem et ordinationem primariam de statu eorundem antiquitus observatam supposuerunt et subjecerunt omni ordinationi seu constitutioni nostre quam super exacta residentia ab eisdem et reformatione morum suorum ac aliis contingentibus statum suum ex deliberato consilio ad honorem Dei et salutem animarum suarum decernere seu facere aut pronunciare vellemus promittentes insuper bona fide quod quicquid super hujusmodi residentia et aliis supradictis decerneremus vel faceremus seu pronunciaremus per ordinationem nostram exinde faciendum perpetuis temporibus pro se et suis successoribus in eadem ecclesia sine contradictione et reclamatione qualibet ratum et firmum habebunt Nos autem ipsorum devotionem humilitatem bonam fidem et obedientiam attendentes et ideo cum ipsis mitius atque maturius agere cupientes eisdem Sacriste Cancellario tam pro se quam pro Precentore jam dicto et prenominatis quatuor clericis de Berefeld[] presentibus et prefatis aliorum procuratoribus in personis dominorum suorum predictorum clericorum de Berefeld tunc absentium de expresso consensu omnium eorundem hunc instantem diem Mercurii proximum ante festum Sancti Martini in hyeme pro certo termino peremptorio et preciso ad audiendum et pariter suscipiendum ordinationem nostram super omnibus supradictis et pro plenaria consummatione negotii sive venerint sive non finaliter duxerimus ordinandum Cum igitur super toto processu predicto precedentibus diebus diversis prout nobis vacabat et fieri potuit expedito nobis hoc instanti die Mercurii predicto prenominatis sicut predicitur assignato in hoc capitulo ecclesie Beverlacensis pro tribunali sedentibus ad plenum et legitime constet recitato in primis coram nobis et aliis toto processu predicto in forma superius desingnata ac Canonicis Precentore Sacrista Cancellario Preposito et aliis clericos de Berefeld sufficienter comparentibus ac suas voluntatem subjectionem suppositionem promissionem et omnem consensum suum laudantibus et expresse facientibus iterato et renunciato expresse omnibus si que fieri possent appellationibus pronunciationibus exceptionibus defensionibus privilegiis indulgentiis libertatibus ac omnibus impetratis seu si que possent futuris temporibus impetrari et insuper per adjectionem vehementer apud nos instantibus cum effectu quod ad decretum seu ordinationem vel declarationem seu provisionem constitutionem seu pronunciationem nostram super residentia et statu predictorum Precentoris Sacriste Cancellarii Prepositi et aliorum septem clericorum de Berefeld sicut melius viderimus expedire protinus procedamus Nos in nomine Patris et Filii et Spiritus Sancti fundationem hujus ecclesie Beati Johannis Beverlacensis primariam attendentes ac ordinationem precepta et voluntatem Deo devotorum principum similiter advertentes ac cartas litteras et instrumenta libertatum hujus ecclesie quorum aliquorum copiam habemus ad manus signanter seriosius revolventes ac super omnia ad statum primitivum hujus ecclesie ac aliorum officialium et septem clericorum predictorum ex officii nostri libramine debitum respectum habentes Canonicorum et Prepositi hujus ecclesie ac aliorum communicato consilio peritorum providemus ordinamus declaramus decernimus promulgamus pronunciamus et etiam publicamus quod omnes prenominati Precentor Sacrista Cancellarius et alii clerici de Berefeld ejusdem ecclesie nunc numero sex qui cotidianam in victualibus et aliis necessariis exhibitionem et sustentationem continuam pro suis servitiis percipiunt ab eadem versa vice pro officii sui debito cotidianam et continuam residentiam faciant in eadem circa officiationem et exhibitionem servitii sui diebus et noctibus in eadem ecclesia facturi de cetero quod a predecessoribus eorundem fieri consuevit ab antiquo Salva tamen nobis tantummodo [et successoribus nostris] potestate [sicut nobis de jure nunc incumbentibus] Sacriste Cancellario et sex clericis de Berefeld nunc in Capitulo de Beverlaco presentibus ad tempus dispensationis gratiam exhibendi prout nobis visum fuerit expedire onera et gravamina si appareant ad tempus largius vel recisius relaxandi de septimo clerico qui deficit et ipsius corrodio ordinandi contumacias preteritas multorum de predictis debita pena plectendi ac circa omnia et singula supradicta declarandi exequendi et faciendi quod ad honorem Dei et Beati Johannis ac aliorum sanctorum omnium necnon ad salutem animarum suarum quotiens expedire viderimus visum nobis fuerit oportunum Statum vero Domini Petri Prepositi Beverlacensis et successorum suorum in prepositura eadem quantum ad quedam que comodum ipsorum et utilitatem ejusdem ecclesie Beati Johannis Beverlacensis respicere dinoscuntur usque in aliud tempus magis congruum facienda ex certis considerationibus reservamus Et quia memorati Precentor Sacrista et Cancellarius officiorum suorum ac dicti clerici de Berefeld sigilla propria non habent ad ipsorum instantiam de consensu eorundem sigillum nostrum una cum sigillo Capituli et Prepositi dicte ecclesie Beverlacensis huic instrumento per modum cirograffi confecto est appensum in premissorum fidem et testimonium veritatis Actis et datis in hoc capitulo nostro hujus ecclesie nostre Beverlacensis hac instanti die Mercurii predicto proxima ante festum S[ancti] Martini A[nno] D[omini] MCC nonagesimo et pontificatus nostri quinto