Charter Document - 02841160
| Charter Number: | 02841160 |
|---|---|
| Cartulary Title: | Memorials of Beverley Minster |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1290 |
| Date type: | Internal, A.D., Calendar |
| Resource Link(s): |
Borthwick Institute - Register 4 (f97v) |
Charter:
Noverint universi quod cum inter venerabilem patrem ac dominum Johannem Dei gratia Ebor archiepiscopum [] et Magistrum Robertum de Scardeburg occasione quorundam processuum et sententiarum quarundam habitorum et latarum contra eundem Magistrum R quoad decanatum Ebor ecclesie et quoad prebendam de Hustwayt in eadem ecclesia et quoad quandam prebendam in ecclesia Beverlacensi et quoad ecclesiam parochialem de Athelingflet Ebor dioecesis materia gravis discordie fuisset exorta tandem ad beneplacitum magnifici principis Domini E Dei gratia Regis Anglie illustris totius hujusmodi materia contentionis conquievit in hunc modum videlicet Quod remissis utrobique injuriis offensionibus ac malivolentius quibuscunque predictus Magister R totum jus quod habuit vel habere potuit in dignitate et beneficiis antedictis mera et spontanea voluntate in manus dicti Domini Ebor pure et absolute totaliter resignavit Predictus vero Dominus Archiepiscopus nolens talem ac tantum virum absque sustentatione congrua et competenti aliquatenus desolatum relinqui ad caritativam dicti Domini Regis instantiam et voluntatem concessit pro se et successoribus suis de consensu sui capituli quod perpetuo dicto Magistro R solvet eidem vel ejus certo procuratori litteras acquietantie deferenti quadringentas marcas sterlingorum in palatio dicti Domini archiepiscopi apud Ebor ad duos anni terminos videlicet in festo Natalis Domini cc marcas et in festo Nativitatis B[eati] Johannis Baptiste cc marcas incipiente primo termino solutionis in festo Natalis Domini proximo futuro In super concessit ei quod omnia sequestra in decanatu et aliis beneficiis memoratis faciet relaxari et omnia bona et fructus que fuerint in predictis dignitate et beneficiis tempore quo Dominus Rex de manu sua ea dimisit et que ad manus hominum dicti Magistri R[obertum] non devenerunt eidem restitui faciet quantum in ipso est Et ut predicta omnia robur optineant firmitatis tam predictus Dominus Ebor quam predictus Magister R huic scripto tripartito cujus una pars penes Dominum Regem alia penes Dominum Ebor et tertia penes dictum Magistrum R[obertum] residebit sua una cum sigillo capituli Ebor fecerunt apponi sigilla Actis et datis apud Westmonasterium viij Idus Maii anno gratie [MCC] nonagesimo