Charter Document - 02841156

Venerabili in Christo patri domino Jacobo Dei gratia Sancte Marie in Via Lata diacono cardinali J[ohannes] permissione ejusdem Ebor [] Salutem et cum votiva reverentia jocunditatem continuam et honorem Paternitatis vestre litteras pro Oddono clerico nato nobilis viri Adenulfi [filii] quondam Domini Mathei de Papa de Anagnia cui dominus noster summus Pontifex in ecclesia nostra Beverlacensi de canonicatu et prebenda providit reverenter recepimus et preces vestras pro ipso quantum ad nos pertinuit quamquam hec sit decima provisio in nostris ecclesiis hiis diebus prompte curavimus adimplere quas non inter posuissetis ut veraciter attendimus si status prefate ecclesie qui summum pontificem et vos latet omnino vestre prudentie esset notus Rex vero quidam Anglorum quondam sanctissimus in Dei honorem et venerationem B[eati] Johannis archiepiscopi et confessoris specialiter dictam fundavit ecclesiam eamque possessionibus quas optinet sua subventione dotavit stabiliens inibi septem presbiteros perpetuos missas celebrantes qui in esculentis coctis et posculentis cotidianum victum recipientes Deo dictoque confessori in loco ipso sub personali residentia officiosissime deservirent Et ut in pacifico et quieto obsequio ecclesiastico Deo famularentur ibidem ab inquietatione seculari omnimoda segregati memoratus rex Deo devotissimus suprascriptam ecclesiam tantis dotavit libertatibus quod nullam habet quoad conditionem status in Anglia sibi parem Super quibus dum locum ipsum jure ordinario personaliter visitavimus cartam prefati regis vidimus Anglica lingua conscriptum cujus sententia intuentibus est piissima et horribilis profecto presumentibus contra ipsam Set quod absit non ponimus os in celum dum hec vobis ostendimus cum ad exonerationem conscientie dumtaxat ista cogamur vobis cum reverentia aperire parati jugiter apostolicis vestrisque mandatis humiliter obedire Incolumitatem vestram conservet Altissimus temporibus diuturnis Dat apud Wylton xvj Kal Octobris anno gratie MCC octogesimo ix