Charter Document - 02820475

Anno regni Regis Edwardi filii Regis Henrici vicesimo quinto die Jovis in vigilia Omnium Sanctorum convenit inter venerabilem patrem Johannem de Sautre Dei gratia Abbatem Rameseie ex parte una et Willelmum filium Willelmi le Moygne de Magna Ravele ex parte altera Cum controversia esset exorta inter predictos Abbatem et Willelmum super quadam exactione quam predictus dominus Abbas Rameseie a predicto Willelmo filio predicti Willelmi le Moygne exigebat scilicet quod omnes homines Willelmi le Moygne predicti venirent ad letam ipsius Abbatis tentam semel in anno apud Upwode ubi temporibus retroactis non venerunt nec huc usque venire consueverunt ut predictus Willelmus pro jure suo asserebat Tandem communium amicorum interventu utriusque partis convenientium in hunc modum conquievit videlicet quod predictus Willelmus concessit pro se et heredibus suis quod omnes homines sui in Magna Ravele residentes tam cotarii quam custumarii sui de cetero venient ad letam ipsius Abbatis tenendum semel tantum in anno apud Upwode ad recipienda et facienda omnia que ad letam pertinent ita tamen quod rationabiliter sum moniti sint secundum consuetudinem hucusque in predicta leta habitam et consuetam Pro hac autem concessione pace et concordia in futuro plenius affirmanda dictus dominus Abbas concessit pro se et successoribus suis quod predictus Willelmus et heredes sui habeant omnia amerciamenta omnium hominum suorum ad predictam letam amerciatorum ex quacunque causa provenientia exceptis dumtaxat amerciamentis predictorum hominum si non venerint pro defaltis que idem dominus Abbas sibi et successoribus suis retinet inperpetuum Preterea predictus Abbas concessit pro se et successoribus suis quod si aliquis hominum vel tenentium dicti Willelmi purpresturam fecerit et per ducenarium ad diem lete sic presentatum et emendari consideratum amerciamenta inde provenientia sint predicti Willelmi Dum tamen hujusmodi purprestura ante diem lete proximo sequentis per visum presentatorum non fuerit emendata ex tunc idem Willelmus pro hujusmodi defectu secundum quantitatem delicti amerciabitur et de hujusmodi amerciamento predicto domino Abbati et successoribus suis satisfaciet sicut ipse transgressor facere deberet ac si immediate esset tenens Abbatis Et nihilominus dictus dominus Abbas purpresturam hujusmodi tempore debito non emendatam per suos ministros et per visum presentatorum debite faciet emendari absque calumnia et contradictione dicti Willelmi vel heredum suorum Et pro predictis amerciamentis proficuis et aliis commoditatibus capiendis die lete et habendum de hominibus suis predictis tam de hominibus terram vel domos non habentibus et non residentibus quam de residentibus terram et domos habentibus predictus Willelmus concessit pro se et heredibus suis vel assignatis pro proficuis predictis habendum sicut predictum est reddere dicto domino Abbati et successoribus suis annuatim quinque solidos sterlingorum die lete predicte Proviso tamen quod Ballivus dicti Willelmi vel aliquis nomine ipsius veniat ad letam predictam ad recipiendas extractas amerciamentorum de hominibus predicti Willelmi amerciatis Que quidem extracte libenter eisdem petentibus per manus ministrorum domini Abbatis qui letam predictam tenuerint absque cavillatione vel prorogatione aliqua In cujus rei testimonium tam predictus dominus Abbas quam predictus Willelmus le Moygne his mutuis scriptis sigilla sua apposuerunt His testibus domino Johanne de Deen milite Willelmo de Wassingle seniore Johanne de Clervaus domino Johanne de Wystowe Rectore ecclesie de Craunfeld Willelmo de Ravele Ranulpho de Clervaus Alano dicto Coco et aliis