Charter Document - 02749679

Alexander episcopus seruus seruorum dei dilectis filiis decano Ebor et archidiacono Oxon Linc[] dioecesis salutem et apostolicam benediccionem Ex tenore peticionis dilecti filii magistri Ricardi decani Linc[] accepimus quod cum olim non nulli decani Linc[] predecessores sui ecclesiam de Esseburn Conuentrensis et Lichefeldensis dioecesis in qua racione sui decanatus ius patronatus obtinet in vsus proprios tenuissent Tandem per quandam ordinacionem quam fecit bone memorie Conuentrensis et Lichefeldensis episcopus loci dioecesanus cum quondam [] decano Linc[] predecessore suo perpetuus est institutus in eadem ecclesia vicarius cui plusquam medietas prouentuum eiusdem ecclesie iuxta ordinacionem eandem extitit deputata Conuentrensis et Lichefeldensis capitulorum assensu ad id postmodum vt dicitur accedente in ipsius decanatum et suam non modicam lesionem Vnde dictus decanus humiliter peciit super hoc sibi et eidem decanatui prouideri Nos igitur ipsius supplicacionibus inclinari vt idem decanus vel successores sui dictam ecclesiam cedente vel decedente ipsius ecclesie vicario cum nolimus ex premissis dictum decanatum pati huiusmodi lesionem in proprios vsus decanatus eiusdem libere reuocare possint ipsam decanatui predicto cum omnibus suis iuribus prouentibus et pertinenciis applicando ac eciam ingredi possessionem eius prout dictorum predecessorum suorum temporibus ab ipsis haberi solebat dioecesani vel archidiaconi loci aut cuiusque alterius assensu minime requisito assignata tamen vicario qui pro tempore in eadem ecclesia fuerit de ipsius ecclesie prouentibus porcione congrua vnde valeat commode sustentari et episcopalia et archidiaconalia iura et cetera ipsius ecclesia onera supportare ordinacione ac aliis premissis nequaquam obstantibus aut aliquibus litteris apostolice sedis super quorumcunque prouisionibus impetratis seu reseruacionibus aut inhibicionibus per eas factis vel eciam faciendis seu aliis litteris vel indulgenciis apostolicis et quibuscunque obtentis vel eciam obtinendis per quas huiusmodi gracia impediri valeat vel differri per nostras litteras duximus indulgendum Quo circa discrecioni vestre per apostolica scripta mandamus quatinus predictum decanum vel successores ipsius aut eorum procuratorem ipsorum nomine in eiusdem ecclesie possessionem cedente vel decedente predicto vicario per vos vel per alios inducatis et defendatis inductos contradictores per censuram ecclesiasticam appelacione postposita compescendo non obstante si aliquibus et sede apostolica sit indultum quod interdicti suspendi vel excommunicari non possint et constitucione de duabus dictia edita in concilio generali Quod si non ambo hiis exequendis potueritis interesse alter vestrum ea nihilominus exequatur Dat Viterbii xij kalendas Iunii pontificatus nostri anno quarto