Charter Document - 02740656

Omnibus Christi fidelibus presens scriptum inspecturis Celestria priorissa de Ankerwik[] et eiusdem loci conuentus salutem in domino Noueritis quod nos deo inspectore vnanimiter prouidimus firmiter concessimus et inuiolabiliter ordinauimus quod in domo nostra de Ankerwik[] preter capellanum qui consuetum diuinum officium ibidem nobis celebrare tenebitur decetero inperpetuum vnus sit capellanus secularis vir honestus et bone conuersationis qui singulis diebus quibus licitum est pro defunctis celebrare pro anima magistri Nicholai de Farnham et animabus parentum benefactorum suorum et fidelium defunctorum missam celebret pro defunctis Residuumque faciat omni die seruicium quod pro defunctis fieri consueuit scilicet Commendationem Placebo et Dirige speciali memoria tam in cuiusque misse celebratione quam in residuo quod diximus seruicio pro dicto magistro Nicholao ad deum facienda Prouidebimus eciam in domo nostra dicto capellano victum cotidianum tam in cibis quam potibus sufficientem et mansionem sibi honestam et competentem et duas marcas per annum pro suo seruicio vnam scilicet ad festum sancti Michaelis et vnam ad Pascha Et preterea dimidiam marcam ad festum sancti Michaelis inter capellanos parochiales de decanatu loci sicut inferius dicetur erogandam Et eidem capellano ad cotidianam iam dicte misse celebrationem prouidebimus plenarie ministrari Et ne idemptitas celebrandi tedium pariat celebranti liceat dicto capellano in qualibet septimana vna die de beata Virgine celebrare alia uero die qua voluerit de Sancto Spiritu uel de alio quo voluerit sancto Si uero istis duobus diebus uel eorum altero possit idem capellanus alterius habere copiam qui supradictam missam celebret pro defunctis eam cum diligentia procuret celebrari Si uero huius rei copiam non habuerit tunc demum ab hac diligencia relaxetur Cum uero pro tempore contigerit dictum capellanum cedere aut discedere aut pro sua insufficientia uel nostra voluntate rationabili ammoueri prouidebimus cum quanta possumus festinatione quod sine mora temporis uel dici ei alius idoneus subrogetur qui dictum supradicto modo expleat officium et in domo nostra ad sui prouisionem quam supra assignauimus habeat conditionem Hanc uero ordinationem sicut per omnia supradictum est concessimus inperpetuum in domo nostra obseruandam Et in pleno capitulo excommunicare fecimus omnes illos qui eam infregerint uel contra eam venire in aliquo attemptauerint Et ad eternam huius rei memoriam concessimus quod quolibet anno feria secunda qua cantatur officium Sicut oculi seruorum in Quadragesima in capitulo nostro semel in audientia tocius conuentus istud memoriale recitetur et ibidem in singulis suis articulis sub pena excommunicationis singulis annis innouande precipiatur deinceps firmiter obseruari Et ad maiorem securitatem obseruationis premissorum subicimus nos potestati iurisdicionis ordinarie super omnibus predictam nostram concessionem contingentibus Ita quod si forte aliquo tempore aliquid circa premissa attemptauerimus ordinarii nostri sine quacumque reclamatione uel appellatione sub pena viginti marcarum quocienscunque et quandocunque supradicta concessio et promissio nostra in aliquo minus fuerit obseruata nos cohercendi liberam habeant potestatem Capellanus siquidem siue fuerit annuus sine perpetuus singulis annis in proximo capitulo post festum sancti Michaelis vbi capellani coram suo ordinario conueniunt cum presenti concessione et promissione nostra se in capitulo presentabit et dimidiam marcam annuatim quam a nobis recipiet sicut predictum est ex parte nostra deferet pro anima dicti magistri Nicholai per decanum loci inter singulos capellanos parochiales proportionaliter erogandam per quos anime eius et omnium fidelium defunctorum sollempnis ibidem fiet absolutio Et hanc concessionem et promissionem nostram in eodem capitulo in publica legi faciat audientia manifesto et distincte Ita quod per ipsum ordinarium qui eodem die eidem preerit capitulo diligens fiat inquisitio an hoc concessio et promissio nostra in omnibus suis articulis sicut predictum est sit fideliter obseruata Quod nisi factum fuerit ad condignam emendationem concedimus per penam supradictam nos compelli per eundem Et ne per hanc nostram concessionem domus nostra aliquo tempore in posterum possit pregrauari dictus magister Nicholaus ad predicti oneris sustentacionem et ad ecclesie nostre meliorationem dedit nobis successoribus nostris et ecclesie nostre caritatiue in liberam et perpetuam elemosinam vnum mesuagium in villa de Greneford[] et octo viginti acras terre arabilis in eadem villa cum annuo redditu quadraginta et quatuor solidorum in comitatu Middelsex[] cum omnibus ad predicta mesuagium terram et redditum pertinentibus cum instrumentis que de predictis mesuagio terra et redditu habuit et cum toto emolumento quod ratione dictorum instrumentorum sibi uel assignatis suis aliquo modo in posterum possit prouenire Hec autem concessio et promissio nostra in modum cyrographi confecta est Ita quod vna pars in aliqua domo religiosa in archidiaconatu Bukingehamie prout ordinarii prouiderint residebit Altera uero pars in thesauraria cathedralis ecclesie Lincoln[] tercia autem pars penes nos remanebit quocienscunque requisite fuerimus ordinariis nostris exhibenda Ita quod vnicuique parti signum nostrum appendetur Et ad maiorem huius ordinationis et concessionis nostre firmitatem dominus Robertus dei gratia Lincoln[] episcopus eam auctoritate pontificali confirmauit et vnamquamque partem huius scripti in modum cyrographi confecti sigilli sui munimine roborauit