Charter Document - 02739388

Omnibus Christi fidelibus ad quos presens scriptum peruenerit Henricus permissione diuina Linc episcopus salutem in domino sempiternam Cum viri religiosi prior et conuentus monasterii Lewensis Cluniacensis ordinis Cicestrensis diocesis pretendentes coram nobis ecclesiam de Meuton[] nostre diocesis cum suis pertinenciis suis usibus olim esse concessam per bone memorie Robertum Linc episcopum predecessorem nostrum intuitu pietatis Que postmodum ipsi monasterio cum omnibus ad eam pertinentibus tam per loci metropolitanum quam per sedem apostolicam exstitit confirmata ac ipsi postmodum a possessione eiusdem ecclesie per contrarium factum suum ex quadam simplicitate ut asserunt essent diucius destituti et tandem supplicantibus ipsis ex sedis apostolice prouidencia ad ius pristinum in integrum restituti prout per instrumenta auctentica exinde confecta coram nobis exhibita et plenius intellecta ostendere nitebantur se demum finaliter pure et absolute ordinacioni nostre super ipsa ecclesia cum omnibus suis pertinenciis ac vicaria in eadem taxanda et ordinanda in omnibus et per omnia submisissent sicut in auctenticis suis litteris patentibus quas exinde nobis fecerant plenius continetur nobis humiliter supplicantes ut ex officio nostro super hiis sibi gratiam impendere curaremus Nos prehabito consilio decani archidiaconorum et aliorum plurium canonicorum ecclesie nostre Linc deuotis dictorum prioris et conuentus supplicacionibus inclinati ordinacionem huiusmodi in nos suscepimus faciendam Ratum igitur et gratum habentes quod per predictum predecessorem nostrum factum exstitit in hac parte Ordinamus auctoritate pontificali et statuimus ordinando quod in dicta ecclesia de Meuton[] sit perpetua vicaria Dictique prior et conuentus ac eorum successores futuris temporibus successiue presbiterum ydoneum nobis et successoribus nostris canonice presentent instituendum euo perpetuo in eadem vicaria Qui duos capellanos vnum diaconum et vnum subdiaconum competentes et honestos ipsius vicarii sumptibus exhibendos secum continuo habeat residentes ad diuina obsequia in eadem ecclesia perpetuo sustinenda Habeant autem dicti prior et conuentus integre et pacifice totam terram pertinentem ad ecclesiam de Meuton[] cum pratis pascuis et pasturis et omnibus aliis ad dictam terram ecclesie pertinentibus Percipiant etiam iidem prior et conuentus totam decimam garbarum et feni et totam decimam agnorum et principalia legata in viuis animalibus ac pecoribus consistencia et triginta solidos annuos de abbate et conuentu de Werwedon[] quas ecclesia de Meuton consueuerat ab eisdem percipere nomine decimarum Et vicarius qui pro tempore fuerit percipiet totum altaragium dicte ecclesie de Meuton[] scilicet totam decimam lane omnesque alias minutas decimas oblaciones et obuenciones vndecunque ad dictam ecclesiam nomine altaragii pertinentes Sustinebunt autem dicti prior et conuentus onera reficiendi reparandi ac etiam de nouo construendi cancellum dicte ecclesie cum necesse fuerit et etiam omnia onera extraordinaria Ad hec pro recompensacione dampnorum que ex dicta appropriacione ac nostra ordinacione contingere possent in hac parte ordinamus et statuimus quod dicti prior et conuentus soluant annuatim imperpetuum in signum reuerencie et honoris et conseruacionem indempnitatis de dictis bonis ecclesiasticis suis usibus assignatis tresdecim marcas argenti ecclesie nostre Linc[] in ipsa ecclesia per suum proprium nuncium sacriste eiusdem loci tradendas die Natiuitatis beati Johannis Baptiste in usus vicariorum ac clericorum ministrancium in ipsa ecclesia conuertendas prout super hoc duxerimus ordinandum Item quod soluant perpetuo annuatim archidiacono loci qui pro tempore fuerit pro dampnis suis in posterum recompensandis preter annuam procuracionem quam vicarius ei soluet duas marcas argenti uel suo certo nuncio ad ecclesiam de Meuton[] dicto die sancti Johannis Preterea assignabunt dicti prior et conuentus dicto vicario vnum mansum edificatum ab omni onere et seruicio liberum et quietum prope ecclesiam competentem sibi et suis ad inhabitandum si quem ibi talem habeant alioquin mansum alium adeo liberum et quietum ecclesie vicinum sibi assignent et eidem vicario pre manibus decem marcas persoluant absque more dispendio ad edificia sibi construenda ibidem Vicarius autem qui pro tempore fuerit ac ipsa vicaria sustinebunt omnia onera ordinaria debita et consueta dictam ecclesiam de Meuton[] contingencia et inueniendi reficiendi et reparandi libros vestimenta calices et alia uasa ceteraque omnia ornamenta ecclesiastica in ecclesia memorata Hec autem ordinamus et statuimus perpetuo manere uolumus illibata Saluis in omnibus episcopali et Linc ecclesie dignitate et nobis ac successoribus nostris auctoritate ac potentate interpretandi et declarandi si quid dubium super dicta ordinacione personatus et vicarie forsan emerserit in futurum et etiam compellendi dictos priorem et conuentum ac vicarium suosque successores ad plenam obseruacionem huius nostre ordinacionis interpretacionis et declaracionis eiusdem si qua fieri contingat de plano et absque strepitu iudiciali per sequestracionem et subtractionem fructuum et prouentuum dicte ecclesie de Meuton[] aliisque modis quibus nobis uisum fuerit expedire Act[] apud Tyngehirst[] iij nonas Februarii anno domini mccl quinto presentibus magistris R de Sancta Agatha tunc officiali Linc[] Dauid de Sancta Fredeswida archidiacono Dereb[] Johanne de Dereb[] Rogero de Caua domino Willelmo de Hampton[] canonicis Linc[] dominis R de Drayton[] R de Wika W de Benington[] G de Leyc[] Hugone de Selthon[] Johanne de Sar[] et aliis