Charter Document - 02730392

Uniuersis sancte matris ecclesie filiis ad quos presens scriptum peruenerit Henricus permissione diuina Lincoln[] episcopus salutem in domino sempiternam Ad vniuersitatis uestre noticiam per presentem paginam uolumus peruenire quod cum dilecti filii abbas et conuentus de Osolueston[] dicti patroni ecclesie de Slauston[] ordinacionem ipsius ecclesie uacantis uoluntati nostre simpliciter submiserint et absolute Nos intellecto quod dictum monasterium temporalium rerum inopia sit oppressum attento etiam quod sacre religionis domus non sufficit edificari nisi adhibeatur cura cum effectu ut expense eam decentes et ad sacramentorum ministerium et ad religionem obseruantium alimenta prouideantur dictorum abbatis et conuentus inopie pio compacientes affectu ac eorum necessitati prout cure pastoralis nos ammouet sollicitudo in aliquo consulere intendentes neccessitate ipsa perurgente ac utilitate religionis digna fauore plenius suadente competenti tractatu et deliberacione prouida prehabitis de ecclesia memorata diuino intuitu in hunc modum auctoritate pontificali duximus ordinandum Quod sepefati abbas et conuentus ecclesiam de Slauston[] supradictam in usus proprios retineant eiusque prouentus et redditus in huiusmodi usus conuertant vicario in eadem in qua iugem ordinamus et constituimus uicariam perpetuo seruituro de ipsius ecclesie prouentibus porcione congrua reseruata pro sustentacione sua et ad onera que inferius exprimentur sibi incumbencia supportanda Porciones autem dictorum abbatis et conuentus ac vicarii prelibati ita duximus distinguendas Quod abbas et conuentus in parochia dicte ecclesie de Slauston[] in qua decem carucate terre consistunt omnes decimas de vij carucatis ipsius terre prouenientes et vnam carucatam terre que est de dominico ecclesie supradicte ac medietatem decime feni necnon et mansum ecclesie iam edificatum optineant inconcusse Totum uero altaragium dicte ecclesie reliqua etiam medietatem decime feni et decimam prouenientem de reliquis tribus carucatis terre memorate videlicet de octo uirgatis terre de feodo Hugonis de Neuill[] in territorio de Slauston[] quarum Yuo Camerarius tenet tres Reginaldus Abbe unam Joerius filius Sare vnam Radulfus Fabbe et Godefridus de Greyuill[] unam Adam filius Yuonis et Thomas de Neuill[] vnam Agnes filia Hugonis de Neuill[] et Walterus Albert vnam Item de tribus uirgatis terre in territorio memorato de feodo de Huntedon[] quarum unam tenent Robertus Gyrun et Radulfus Alheile Johannes uero filius Agnetis et ipsa Agnes mater eiusdem Johannis unam et dimidiam Willelmus Pavy dimidiam Item de vna uirgata de feodo de Aubeny in territorio supradicto cuius medietatem tenet Radulfus Alheile et aliam Willelmum de Crawenhou vicarius nobis et successoribus nostris a predictis abbate et conuentu ad dictam vicariam successiue pro tempore presentandus per hanc nostram ordinacionem inperpetuum racione uicarie percipiet memorate cui dictus abbas et conuentus mansum hac prima uice loco congruo sine more dispendio construent competentem reficiendum deinceps uel de nouo faciendum si casus uel neccessitas hec exigat per vicarium prelibatum Onera synodalium et alia synodalibus minora archidiacono contingencia necnon extraordinaria pro sua rata subiturus abbate et conuentu supradictis procuracionem archidiaconi et alia onera ordinaria vniuersa et singula necnon et extraordinaria pro sua rata quocienscunque et qualitercunque emerserint sustinentibus uniuersa Qui quidem libros competentes et ornamenta dicte ecclesie sufficiencia inuenient ista vice et cancellum ecclesie quociens opus fuerit emendabunt Vicario qui pro tempore fuerit tam circa dictorum librorum ac ornamentorum reparacionem cum necesse fuerit quam nouorum antiquis usu consumptis uel inutilibus effectis comparacionem medietatem sumptuum inposterum ministrante Nobis et successoribus nostris ad augend[] vicariam ipsam reseruata si processu temporis reperiatur insufficiens potestate Saluo iure patronatus cuilibet ad quem debeat pertinere si de eo quandocunque inter aliquos moueri contigerit questionem Saluisque nobis et successoribus nostris Linc[] episcopis omni iure episcopali et Linc[] ecclesie dignitate Vt autem plena fides huic nostre ordinacioni adhibeatur et dictis abbati et conuentui perpetua securitas preparetur presentem paginam tam nostro quam capituli nostri Linc[] sigillo fecimus communiri Dat[] apud Parcum Stowe iiij kalendas Aprilis anno domini mccl octauo et pontificatus nostri anno quarto