Charter Document - 02720004

Innocentius episcopus [] dilectis filiis abbati et archidiacono Westmonasterii London salutem [] Cum dilectos filios custodem et fratres hospitalis sancti Iohannis de Oxonia Lincolniensis diocesis ac hospitale ipsum quod carissimus in Cristo filius noster rex Anglorum illustris ad sustentacionem pauperum scolarium et aliarum miserabilium personarum fecit construi de bonis regiis et decorari ad preces ipsius regis cum omnibus bonis que in presentiarum rationabiliter posssidet aut in futurum iustis modis prestante domino poterit adipisci sub protectione susceperimus apostolice sedis et nostra dictis custodi et fratribus concedentes ut pro se ac familiaribus suis et pauperibus in hospitali degentibus memorato capellas et cimiterium liceat ipsis habere ac oblationes et obuentiones quas Cristi fideles eidem contulerint hospitali uel reliquerint testamento in eius usus conuertere ac pauperum predictorum et cum interdictum terre fuerit generale clausis ianuis excommunicatis et interdictis exclusis non pulsatis campanis uoce suppressa in dictis capellis officia possint celebrari diuina dummodo ipsi causam non dederint interdicto districtius inhibendo ne diocesanus uel archidiaconus loci racione uisitacionis procurationes ab eis exigere aut extorquere presumat quodque nullus delegatus subdelegatus executor uel eciam conseruator auctoritate sedis apostolice uel delegatorum ipsius in eorum personas seu familiarium suorum excommunicationis seu interdicti sentenciam audeat promulgare absque mandate sedis apostolice speciali Discrecioni uestre per apostolica scripta mandamus quatinus predictos custodem et fratres non permittatis contra prescriptarum protectionis concessionis et inhibitionis nostrarum tenorem ab aliquibus indebite molestari molestatores huiusmodi per censuram ecclesiasticam appellatione postposita compescendo Quod si non ambo his exequendis potueritis interesse alter uestrum ea nichilominus exequatur Dat Lugdun X kalendas aprilis pontificatus nostri anno tercio