Charter Document - 02660979

Alexander episcopus servus servorum Dei dilectis filiis priori et monachis Dunelmensibus salutem et apostolicam benedictionem Rationabilibus votis et desideriis religiosorum virorum prompto nos decet animo et benignitate intendere et eis super his que rationabiliter possident confirmationis nostre subsidium benignius impertiri Inde est quod nos vestris justis postulationibus grato concurrentes assensu dispositionem reddituum ecclesie de Alvertona et ecclesie de Norram sicut eam rationabiliter possidetis vobis et ecclesie vestre auctoritate apostolica confirmamus et presentis scripti patrocinio communimus arctius inhibentes ne ecclesiam de Houeden que ad jurisdictionem vestram noscitur pertinere laicali potentia alicui maxime Rogerio filio Roberti qui eam tenet concedere presumatis sed ibi cum assensu et auctoritate diocesani episcopi secundum canonicam institutionem personam idoneam ordinetis que vobis de temporalibus episcopo vero de spiritualibus debeat respondere Decernimus ergo ut nulli omnino hominum liceat hanc paginam nostre confirmationis et prohibitionis infringere vel ei aliquatenus contraire Si quis autem hoc attemptare presumpserit indignationem omnipotentis Dei et Beatorum Petri et Pauli apostolorum ejus se noverit incursurum Datum Anagnie xiiii kal Augusti