Charter Document - 02650560

Universis Christi fidelibus hoc scriptum inspecturis vel audituris h[ugo] divina miseracione abbas Cyr et eiusdem loci conventus salutem eternam in Domino Noverit universitas vestra nos ad instanciam venerabilis patris Roberti Sarum episcopi et aliorum mangnatum et nobilium de consensu vicarii ecclesie de Cocham concessisse domino Willelmo de Colewrth[] quod habeat privatum oratorium in curia sua de Elynton[] infra parrochiam nostram de Cocham xxiiij pedum in longitudine et xvj pedum in latitudine quod pro tempore possit refeci set non ampliari tali condicione videlicet quod ingressus et egressus sit per medium aule ipsius Willelmi et successorum suorum ad dictum oratorium quod quicumque capellanus ibidem ministraverit faciet fidelitatem matrici ecclesie de Cocham cuius est parrochianus idem Willelmus corporali prestito juramento ab eodem capellano coram aliquo a nobis ad hoc deputando et coram vicario ecclesie de Cocham quod omnes proventus dicti oratorii matrici ecclesie de Cocham integre persolvet Item idem Willelmus obligavit se sacramento et scripto de omni indempnitate nostra et matricis ecclesie de Cocham videlicet quod nullo modo causam dabit vel occasionem per se vel per alium unde nos vel dicta ecclesia nostra de Cocham in aliquo gravemur vel dampnificemur Et eandem securitatem et caucionem obligatoriam prestabunt heredes ipsius Willelmi vel eius successores singuli qui pro tempore fuerint ita quod non celebrentur divina in ipso oratorio nisi ipse Willelmus miles vel uxor eius vel eius successores fuerint presentes Et non admittantur ibi ad divina audienda vel percipienda aliqui parrochianorum de Cocham nisi tantum domestica familia ipsius Willelmi vel heredum suorum vel successorum qui pro tempore fuerint Item non sit ibi clocherium vel campana non crisma vel oleum sacrum ab ordinario sumptum vel aliunde allatum nec baptisterium nec aliquid loco baptisterii nisi mortis periculo imminente nec sit ibi cimiterium vel sepultura nec nupcie ibidem celebrentur nisi forte necessitatis articulo uxoris ipsius Willelmi vel heredum suorum Preterea dictus Willelmus cum uxore et familia sua in die Pasche dedicacionis ecclesie et in die sancte Trinitatis veniant ad matricem ecclesiam divina audituri et festis predictis non celebrentur divina in dicto oratorio Item si aliquod dampnum de quo legittime constare possit aliquo tempore inciderit nobis vel ecclesie nostre de Cocham occasione dicti oratorii vel eiusdem ministracionis et post trinam admonicionem nostram vel vicarii ecclesie de Cocham infra quindenam non fiat satisfactio vel si ventum fuerit contra aliquem predictorum articulorum ex parte dicti Willelmi vel successorum suorum suspendatur dictum oratorium per ordinarium loci donec plene satisfactum fuerit ecclesie nostre de Cyr[] et ecclesie de Cocham Item non celebrabit aliquis divina in dicto oratorio residenciarie vel consuetudinarie nisi tantummodo capellanus dicti Willelmi vel heredum suorum quem ad sumptus suos habuerit Item dabit dictus Willelmus et successores suos nobis ij sol annuos et vicario de Cocham unam libram cere annuatim in festo sancti Michaelis pro recognicione subjectionis dicti oratorii Ad majorem autem securitatem huius rei ut predicta omnia perpetuo observentur apposita sunt huic scripto in modum cyrography confecto signa venerabilis patris Roberti Sar[] episcopi et magistri Egidii tunc temporis archidiaconi Berksir[] cum signis parcium mutuo hinc inde appositis Et facta fuit dicta concessio dicto Willelmo anno ab Incarnacione Domini millesimo ccxxxvij circa festum Purificacionis beate Marie