Charter Document - 02620421

Omnibus [] I de Maydeneston archidiaconus Bedefordie domini Lincolniensis episcopi uicarius et R de Meppam archidiaconus Oxon[ie] eternam in domino salutem Nouerit uniuersitas uestra quod cum super quarundam decimarum spolatione coram diuersis iudicibus mote fuissent controuersie inter abbatem et conuentum Oseneye actores ex parte una et magistrum Thomam de Glouernia rectorem ecclesie de Welleford reum ex altera tandem heedem partes spontanea voluntate se nostre ordinationi et prouisioni submiserunt seu supposuerunt promittentes sub pena centum solidorum sterlingorum se nostre ordinationi et prouisioni parituras ac neque per se neque per suos in aliquo contrauenturas hinc inde sacramentum prestando corporale Uerum frater Rogerus de Wald canonicus dictorum religiosorum procurator ad hoc specialiter deputatus sue submissioni seu suppositioni adiciebat dominos suos et ipsum ad predictas controuersias uelle resilire et dictam penam nichilominus exigere si nostre ordinationi et prouisioni dictus magister Thomas non paruerit seu per se uel per alios contrauenerit petens nomine dominorum suorum antedictorum contra dictum magistrum Thomam per nostram ordinationem et prouisionem dominos suos et se restitui et reduci ad statum et possessionem percipiendi duas partes decimarum tam maiorum quam minorum de dominicis Ade et Ricardi de Alfyntona quarum decimarum possessione dominos suos prenominatos per dictum magistrum Thomam temere spoliatos esse asserebat Decima tamen terrarum dictis A et R de nouo adquisitarum et ab antiquo dicti magistri Thome ecclesie integraliter decimalium et molendini a dicta submissione seu suppositione de consensu parcium penitus excepta Peciit etiam fructus medio tempore perceptos si extarent alioquin ipsorum estimacionem et expensas in lite factas Ac partibus hinc inde iuratis et examinatis delucide constabat prefatos religiosos predictarum decimarum possessione aliquamdiu esse destitutos Nos igitur archidiaconi prenominati super dictarum decimarum spoliatione ordinatores prouisores et amicabiles compositores de dictarum parcium expresso consensu electi in nomine patris et filii et spiritus sancti Amen auditis et intellectis probationibus dictis et allegationibus utriusque partis suppositione seu submissione sub pena antedicta utrimque in nos facta ac omnibus aliis dictum negocium tangentibus cum diligencia recensitis pro bono pacis predictos abbatem et conuentum et eorum procuratorem eorundem nomine in statum et possessionem percipiendi duas partes decimarum tam maiorum quam minorum de dominicis Ade et Ricardi de Alflynton ipsorumque successorum per hanc nostram ordinationem et prouisionem plenarie reducimus et restituimus Decima tamen terrarum dictis A et R de nouo adquisitarum et ab antiquo dicti magistri Thome ecclesie integraliter decimalium et molendini ab ista ordinatione et prouisione penitus exclusa laudantes ordinantes et prouidentes quod eisdem religiosis et eorum procuratori eorumdem nomine corporalem et realem possessionem publice in ecclesia de Welleford die festiuo per se vel per procuratorem ad hoc specialiter deputatum infra mensem post presentis ordinationis et prouisionis prolationem dictus magister Thomas reddi et restitui faciat ac moneat predictos A et R quod dictam decimam predictis religiosis et eorum procuratori suo nomine plenarie persoluant Laudamus etiam ordinamus et prouidemus quod dictus magister Thomas per se uel per alios dictos abbatem et conuentum uel eorundem procuratorem de cetero non inpediat nec inpediri procuret quominus dictarum decimarum possessione et perceptione pacifica plenarie gaudeant prout ante dicte destitutionis tempora plenius gaudere consueuerant Ipsum uero magistrum Thomam ab impetitione procuratoris dictorum religiosorum super fructibus medio tempore perceptis et expensis in dictis controuersiis factis absoluentes utrique tamen parti questionem proprietatis super dictis decimis reseruamus Acta in aula dicti domini archidiaconi Oxon in vigilia Purificationis beate Marie anno domini mcclxx primo