Charter Document - 02620386

Acta in ecclesia parochiali de Wytefeld in uigilia sancte Agnetis anno gratie mcclxx secundo coram nobis Officiali domini Archidiaconi Oxon iurisdiccione ordinaria cognoscente in causa que super quodam mortuario uertitur inter religiosos uiros abbatem et conuentum Oseneye actores per fratrem Rogerum de Waldis eiusdem loci canonicum procuratorem suum legitime constitutum ex parte una et Hugonem Swetesone filium et heredem executorem testamenti Rogeri Swetesone defuncti de parochia de Watlintona reum personaliter comparentem ex altera uidelicet cum constaret nobis dictum Hugonem legitime fuisse uocatum dictorum religiosorum procurator contra dictum Hugonem intentionem proposuit in hunc modum Coram uobis domine Iudex ego frater Rogerus procurator dictorum religiosorum ecclesiam de Watlintona pleno iure tenencium dico et propono contra dictum Hugonem quod cum ex pia et laudabili consuetudine in dicte ecclesie parochia obseruata tempore cuius non exstat memoria sit optentum quod liberi homines in dicta parochia decedentes melius auerium dicte ecclesie nomine mortuarii persoluant iam dictus Hugo dictam consuetudinem contempnens prefati Rogeri patris sui liberi hominis in dicta parochia decedentis melius auerium scilicet quemdam equum nomine mortuarii prestare contradicit iniuste Quare nomine procuratorio peto dictum Hugonem ad predictum auerium dicte ecclesie ac dominis meis et michi nomine mortuarii secundum prefatam consuetudinem prestandum sententialiter et diffinitiue condempnari et eundem condempnatum ad dicti auerii nomine mortuarii prestacionem per censuram ecclesiasticam compelli si ipsum auerium prestandi habeat facultatem Alioquin peto ipsum in eiusdem auerii estimacione michi et dominis meis quatenus in forma iur[is] de ipsius estimatione liquere poterit condempnari Ad quam quidem intentionem prefatus Hugo et Willelmus de la Ho dominus ipsius Hugonis litem contestati sunt in hunc modum dicentes quod nec idem Hugo nec alii liberi homines de ten[entibus] ipsius Willelmi melius auerium nomine mortuarii ecclesie de Watlinton vel eiusdem rectoribus hactenus prestare consueuerunt Allegavit eciam prefatus Hugo ad sui liberationem dictum auerium equum scilicet Willelmo de la Ho liberasse et ipsum equum prestandi non habere facultatem Nos igitur per decanum rectores vicarios de capitulo super dicta consuetudine certificati ad diffiniendum processimus in hunc modum In nomine patris Amen Nos officialis domini Archidiaconi Oxon auditis intellectis per dictas partes hinc inde propositis quia comperimus dictorum religiosorum et procuratoris sui intencionem prenotatam sufficienter esse fundatam sententialiter et diffinitiue condempnamus predictum Hugonem ad melius auerium scilicet equum quemdam dicti Rogeri patris sui defuncti dicte ecclesie de Watlintona ac prefatis religiosis et eorum procuratori racione mortuarii prestandum Set quia ad dicte partis actricis delationem idem Hugo tactis sacrosanctis euangeliis iurauit se non habere facultatem dictum equum prestandi seu liberandi ac ipsius equi estimationem duorum solidorum tempore mortis ipsius Rogeri patris sui exstitisse ipsum Hugonem in dicti equi estimatione scilicet in duobus solidis predictis religiosis condempnamus cum per eosdem Willelmum et Hugonem uel eorum alterum contra consuetudinem prenotatam in prefata parochia generaliter uel in parte maiori obseruatam priuilegium separale ostensum non fuerit nec probatum A qua quidem sententia nostra prefati Willelmus et Hugo in presencia nostra constituti nec reclamarunt nec appellare curarunt licet idem Willelmus ius suum esse percipiendi melius auerium de liberis suis hominibus in dicta parochia decedentibus allegaret In cuius rei testimonium sigillum officiale Archidiaconatus Oxon[iensis] presentibus est appensum