Charter Document - 02620127

Hec est finalis concordia facta in curia domini regis apud Oxoniam a die sancte Trinitatis in quindecim dies anno regni regis Henrici filii Iohannis tricesimo primo coram Rogero de Turkelby Gilberto de Preston Magistro Symone de Wauton et Iohanne de Cobeham iusticiariis itinerantibus et aliis domini regis fidelibus tunc ibidem presentibus inter Iohannem abbatem de Oseneya querentem et Rogerum de sancto Iohanne deforciantem de uiginti et quinque acris terre et uno molendino cum pertinenciis in Odebartona et de quindecim acris terre et tribus mesuagiis cum pertinenciis in Stepelbertona et Oxonia unde placitum conuencionis summouitum fuit inter eos in eadem curia et inter eundem abbatem querentem et predictum Rogerum impedientem de pastura ad sex boues duas vaccas duos afferos sexaginta oues et uiginti porcos in dominica pastura ipsius Rogeri in Stepel Bartona et unde placitum warantie carte summonitum fuit inter eos in eadem curia scilicet quod predictus Rogerus recognouit predictas uiginti et quinque acras terre et predictum molendinum cum pertinenciis in Odebartona simul cum stagno et aqua eiusdem molendini et piscaria eiusdem aque quantum ad ipsum Rogerum et heredes suos pertinent quantum clausum ipsius abbatis durat et similiter predicta tria mesuagia cum pertinenciis in Oxon scilicet unum mesuagium quod est inter terram Segrym de Angulo et terram que fuit Andree Tod et illud mesuagium quod Rogerus Pompe aliquando tenuit in parochia sancte Mildrid et illud mesuagium quod Walterus de Brehulle aliquando tenuit in parochia sancti Iohannis Baptiste esse ius ipsius abbatis et ecclesie sue de Oseneya et illa remisit et quieta clamauit de se et heredibus suis predicto abbati et successoribus suis et ecclesie sue predicte imperpetuum Et preterea idem Rogerus recognouit et concessit predictas quindecim acras terre cum pertinenciis in Stepel Bartona esse ius ipsius abbatis et ecclesie sue de Oseneya ita quod bene licebit eidem abbati et successoribus suis claudere predictas quindecim acras terre et similiter totam pasturam ipsius abbatis que iacet inter predictas quindecim acras terre et cimiterium ecclesie de Stepel Bartona et curiam ipsius abbatis in eadem villa muro fossato uel haya et illam in defensam ponere et proficuum suum inde ad voluntatem suam facere sine contradiccione uel impedimento ipsius Rogeri uel heredum suorum absque aliquo clamio alicuius iuris uel commune que idem Rogerus uel heredes sui poterunt clamare uel exigere infra predictum clausum in perpetuum salua eidem Rogero et heredibus suis quadam semita per medium eiusdem clausi a scalario predicte ecclesie usque ad predictum molendinum de Odebartona per quam ipsi et omnes homines sui poterunt ire et redire pro uoluntate sua pedetenus tantummodo sicut semita illa fuit die quo hec concordia facta fuit Et similiter idem Rogerus recognouit predictam pasturam ad sex boues duas uaccas duos afferos sexaginta oues et viginti porcos in dominica pastura ipsius Rogeri et heredum suorum in eadem villa ubi dominica aueria ipsius Rogeri et heredum suorum pascunt scilicet ad boues cum bobus suis ad uaccas cum uaccis suis as afferos cum afferis suis ad oues cum ouibus suis ad porcos cum porcis suis esse ius ipsius abbatis et ecclesie sue predicte ut illam quam predecessores eiusdem abbatis et ecclesia sua predicta habuerunt de dono Iohannis filii Rogeri patris ipsius Rogeri cuius heres ipse est Et idem abbas et successores sui habebunt et tenebunt predictas quindecim acras terre et predictam pasturam cum pertinenciis de predicto Rogero et heredibus suis in puram et perpetuam elemosinam libere et quiete ab omni seculari seruicio et exaccione imperpetuum Et idem Rogerus et heredes sui warantizabunt acquietabunt et defendent eidem abbati et successoribus suis et ecclesie sue predicte predictas quindecim acras terre et totam predictam pasturam cum pertinenciis suis sicut predictum est et liberam puram et perpetuam elemosinam suam contra omnes homines in perpetuum Et pro hac recognitione remissione et quieta clamatione warantizatione acquietancia defensione fine et concordia idem abbas recognouit et concessit decem acras terre cum pertinenciis in predicta uilla de Stepelbartona scilicet totam illam culturam cum pertinenciis que iacet inter domum que quondam fuit Ricardi Prinke et Brerfurlong cum prato de Blakewelle quod ad illas decem acras terre pertinet esse ius ipsius Rogeri ut illas quas antecessores ipsius Rogeri habuerunt in escambium pro decem acris terre de predictis quindecim acris infra predictum clausum habend et tenend eidem Rogero et heredibus suis libere et quiete ab omni seculari seruicio et exaccione inperpetuum Et idem abbas et successores sui warantizabunt acquietabunt et defendent eidem Rogero et heredibus suis predictas decem acras terre cum predicto prato et omnibus aliis pertinenciis suis liberas et quietas ab omni seculari seruicio et exaccione contra omnes homines imperpetuum