Charter Document - 02619027

Nicholaus episcopus seruus seruorum dei dilectis filiis abbati et conuentui monasterii beate Marie de Oseneia ordinis sancti Augustini et rectori parochialis ecclesie de Mixebury Lincolniensis dioecesis salutem [] Ea que iudicio vel concordia terminantur firma debent et illibata persistere et ne in recidive contentionis scrupulum relabantur apostolico convenit presidio communiri Exhibita siquidem nobis vestra peticio continebat quod cum olim inter abbatem et conventum monasterii beate Marie de Oseneia ordinis sancti Augustini ex una et rectorem tunc parochialis ecclesie de Mixebury predecessores uestros ex altera partibus super inscriptis questio exorta fuisset tandem inter partes ipsas amicabilis compositio intervenit videlicet quod integras decimas omnium de Fullewelheth alias Lebreche et Bordlonde ac duas Castellond necnon duas decimarum partes omnium decimarum de Wyllaston nuncupaturum terrarum infra limites parochie dicte ecclesie consistencium Abbas et Conventus predicti reciperent pro quibus pensionem xl solidorum rectori ipsius ecclesie pro tempore existenti annis singulis soluere tenerentur quodque rector ipse pro tempore existens [haberet] certam pasturam pro pecudibus usque ad numerum tunc expressum in dominio de Mixeburi Abbatis et Conventus eorundem prout in scripto desuper cyrographo continer dicebatur verum Abbas et Conventus ac rector moderni monasterii et ecclesie predictorum proinde attendentes dictarum decimarum sparsam ex diversis agris colligendarum difficultatem ac rixas dissentiones et contumelias que propterea retroactis temporibus evenerant ac in futurum possent verisimiliter evenire unanimi eorum assensu ac aliorum quorum interest convenerunt composuerunt et amicabiliter concordaverunt in hunc modum primo compositionem et ordinationem predictam a tanto tempore observatam quod eius contrarii memoria hominum non existit cassarunt irritarent et annullarunt damnarunt et recesserunt ab ea et qualibet parte sui ac voluerunt quod Rector ecclesie predicte pro tempore omnes et singulas decimas ex quibusvis terris infra parochiam dicte ecclesie consistentibus provenientes quas quibusvis modis Abbas et Conventus predicti tunc usque quovis modo perceperant integre et sine diminutione perciperet decimis de lanis lacte fetu et nutrimentis animalium Abbatis et Conuentus predictorum eis more solito reservatis ac dictus Rector renunciavit pensioni xl solidorum huiusmodi et omni pasture extra parochiam dicte ecclesie existenti ac omni iuri et titulo sibi vel ecclesie sue predicte in illis competenti necnon Abbatem et Conventum ac monasterium huiusmodi de hiis omnibus quietavit et in perpetuum liberavit Voluerunt quoque partes ipse et unanimiter concordarunt quod Rector tam predictus quam qui pro tempore foret ipsius ecclesie omnes et singulos inhabitantes et moram trahentes infra parochiam ecclesie sancti Michaelis Archangeli de Fullewelheth que ad ipsos abbatem et conventum pertinere dinoscitur ad eandem ecclesiam de Mixeburi pro audiendis diuinis et recipiendis ecclesiasticis sacramentis congruis horis recipient et admittent ac illa eis sicut propriis eorum parochianis administrabunt et facient administrari et si contigerit aliquem inhabitantium et moram trahentium eorundem graviter infirmari seu alias legitime impediri quominus ad dictam ecclesiam de Mixeburi pro sacramentis et sacramentalibus huiusmodi recipiendis commode accedere possit rector predictus et successores eius infirmo huiusmodi sine impedimento penitentie et extreme unctionis et quodcunque aliud sacramentum illi expediens Insuper rector et successores singulis annis missam in parochia dicte ecclesie de Fulwellhethe predicta in festo sancti Michaelis penultima videlicet die mensis Septembris celebrabunt seu facient celebrari dummodo sacra indumenta et libri ad congruentiam reperiantur ibidem Ac voluerunt dicte partes ne claudatur os bovi trituranti quod Abbas et Conventus monasterii huiusmodi qui pro tempore fuerint quatuor denarios infra octo dies a die interpellationis eis facte currentes ac singuli inhabitantes et moram trahentes huiusmodi adulti tamen diebus quibus parochiani ecclesie de Mixeburi de iure vel laudabili consuetudine offerre tenentur cum ipsis parochianis Rectori prefato offerant ac decimas personales in festo Pasche et mortuaria si qua contingunt rectori et successoribus prefatis Abbatis et Conventus predictorum nomine recipientibus reddere teneantur Proviso quod rector et successores prefati nullas decimas maiores siue minores aut oblationes aliquas personalibus decimis et mortuariis huiusmodi dumtaxat exceptis infra parochiam ecclesie de Fullewelheth predictam ad Abbatem et Conventum predictos pertinentes perpetuis futuris temporibus quomodolibet vendicabunt Voluerunt etiam [Abbas] et Conventus predicti quod si aliquis inhabitantium et moram trahentium predictorum oblationes aut personales decimas seu mortuaria huiusmodi rectori vel successoribus prefatis ut premittitur persolvenda in parte vel in toto solvere recusarent vel a solutione et redditione cessarent seu aliquis eorum cessaret debite requisitus ex tunc Abbas et Conventus predicti infra octo dies postquam super hoc fuerint requisiti oblationes decimas et mortuaria huiusmodi rectori ecclesie de Mixeburi pro tempore existenti seu eius procuratori legitimo exolvent seu solvi facient sub pena viginti solidorum eidem rectori pro tempore applicandorum ad quam solutionem Abbas et Conventus predicti casu huiusmodi occurrente se efficaciter obligarunt Quod si rector ecclesie de Mixeburi aut successores eius huiusmodi ab administratione sacramentorum cessarent debite interpellati ex tunc Abbati et Conventui liceret similem viginti solidorum penam a rectore prefato exigere ad quam penam et illius solutionem bene et fideliter faciendam prefatus rector se et successores suos efficaciter obligavit prout hec omnia dicuntur in instrumento publico desuper confecto plenius contineri quam quidem compositionem apostolico petivistis munimine roborari Nos igitur vestris supplicationibus inclinati compositionem ipsam sicut rite sine pravitate proinde facta est et ab utraque parte sponte recepta ac hactenus pacince observata auctoritate apostolica confirmamus et presentis scripti patrocinio communimus Nulli []