Charter Document - 02619026

Leo episcopus seruus seruorum dei ad perpetuam rei memoriam Ad ea ex paterne caritatis officio libenter intendimus per que monasteriis singulis et in illis Altissimo famulantibus personis dum expedit de oportune prouisionis auxilio succurratur Dudum siquidem pro parte dilectorum filiorum moderni Abbatis et Conuentus monasterii beate Marie uirginis de Oseneia iuxta Oxoniam ordinis sancti Augustini Lincolniensis diocesis nobis exposito quod cum antea de Cudlyngtone et Hockenorton parrochialium ecclesiarum dicte diocesis rectorie prefato monasterio perpetuo unite annexe et incorporate fuissent si perpetue uicarie ipsarum ecclesiarum eidem monasterio etiam perpetuo unirentur annecterentur et incorporentur ex hoc profecto ipsi Abbas et Conventus pro eorum faciliori sustentacione aliquod subventionis auxilium susciperent et onera eius incumbentia commodius perferre ac quietius divinis beneplacitis vacare possent nos tunc fructuum reddituum et proventuum dicti monasterii verum annuum valorem pro expresso habentes ipsorum Abbatis et Conventus in ea parte supplicationibus inclinati vicarias predictas cum omnibus iuribus et pertinentiis suis eidem monasterio auctoritate apostolica perpetuo univimus annexuimus et incorporavimus ita quod cedentibus etiam ad effectum unionis huiusmodi vel decedentibus illarum modernis possessoribus seu illas alias quomodolibet dimittentibus simul vel successive liceret eisdem Abbati et Conventui per se vel alium seu alios corporalem possessionem vicariarum iurium et pertinentiarum predictorum propria auctoritate libere apprehendere et perpetuo retinere ac eisdem vicariis per unum ex canonicis dicti monasterii ad eorum nutum ponendum et amovendum in divinis deservire et curam animarum parrochianorum earundem parrochialium ecclesiarum excerceri facere diocesani loci et cuiusvis alterius licentia super hoc minime requisita prout in nostris inde confectis litteris in quibus quod fructus redditus et proventus dictarum vicariarum duodecim marcharum sterlingorum secundum communem extimationem valorem annuum non excedebant expressum fuit plenius continetur Cum autem sicut exhibita nobis nuper pro parte dictorum Abbatis et Conventus petitio continebat fructus redditus et proventus vicariarum huiusmodi non duodecim marcharum sed duodecim librarum sterlingorum secundum extimationem predictam valorem annuum etiam tunc non excederent neque excedant et propterea Abbas et Conventus prefati dubitent litteras predictas eis minus utiles reddi seque desuper molestari posse tempore precedente nos eidem Abbati et Conventui ne propterea dictarum litterarum frustrentur effectu providere volentes ipsosque Abbatem et Conventum ac eorum singulos a quibusvis excommunicationis suspensionis et interdicti aliisque ecclesiasticis sententiis censuris et penis a iure vel ab homine quavis occasione vel causa latis si quibus quomodolibet innodati existunt ad effectum presentium dumtaxat consequendum harum serie absoluentes et absolutos fore censentes eorundem Abbatis et Conventus in hac parte supplicationibus inclinati volumus et auctoritate apostolica concedimus quod littere et per illas de dictis vicariis eidem monasterio facte unio annexio et incorporatio predicte et inde secuta quecunque a data presentium valeant plenamque roboris firmitatem obtineant et eis suffragentur in omnibus et per omnia perinde ac si in eisdem litteris quod fructus redditus et proventus vicariarum huiusmodi duodecim librarum et non marcharum similium secundum extimationem predictam valorem annuum non excedebant expressum fuisset quodque Abbas et Conventus prefati eisdem vicariis non solum per unum ex canonicis monasterii huiusmodi sed etiam per ydoneum presbiterum secularem similiter ad eorum nutum ponendum et amovendum in divinis deservire et animarum curam parrochianorum predictorum excerceri facere possunt diocesani prefati seu cuiusvis alterius licentia super hoc vt prefertur minime requisita non obstantibus premissis ac quibusvis apostolicis necnon bone memorie Octonis et Octoboni olim in regno Anglie apostolice sedis legatorum ac in provincialibus et sinodalibus conciliis editis generalibus vel specialibus constitution bus et ordinationibus necnon omnibus illis que in dictis litteris voluimus non obstare ceterisque contrariis quibuscunque Nulli ergo [] Datum Ostie pridie Idus Octobris