Charter Document - 02611202

Omnibus [] Clemens abbas et conuentus Oseneye salutem in domino Sciatis omnes nos intuitu caritatis et donationis quam nobis fecit Robertus de Gai de toto manerio suo de Hamtone Gai et aliorum beneficiorum et seruiciorum que idem Robertus et antecessors sui nobis fecerunt dedisse [] eidem Roberto et Matillidi uxori sue et Philippo et Roberto filiis eorum uictum suum de domo nostra quoad uixerint hoc modo uidelicet eisdem Roberto et Matillidi uxori sue singulis diebus duos panes et tres galones ceruisie quales conuentus habet et de ferculis coquine sicut duobus canonicis Philippo uero prefato de pane et ceruisia canonicorum unum panem et unum galonem et de ferculis coquine sicut uni canonico et dicto Roberto iuniori fratri eiusdem Philippi liberationem unius liberi seruientis domus nostre in cibo et potu Concessimus etiam uni garcioni dicto Roberto de Gai seruituro et uni ancille uxoris sue uictum duorum garcionum de stabulo abbatis Si uero dicta Matilldis obierit idem Robertus percipiet quantum in cibo et potu percipere solebant ipse et uxor sua subtracta liberatione dicte ancille Et si idem Robertus obierit dicta eius uxor percipiet in pane et potu et ferculis sicut unus canonicus Concessimus etiam dicto Roberto de Gai ad uestitum singulis annis ad festum sancti Michaelis capam et tunicam et super tunicam cum manicis de quibus super tunica erit furrata de agnis abbatis precium cuiusque ulne huius robe erit duodecim denar[ii] et idem Robertus sit emptor eiusdem robe per uisum procuratoris domus nostre et ad Phasca tunicam et super tunicam de hab[er]gero precii cuiusque ulne decem denariorum et duo paria botarum per annum scilicet ad festum sancti Michaelis unas botas feltratas et ad Pasca singulas de opere domus nostre Concessimus etiam dicte Matillidi tunicam et pallium de uiridi panno precii cuiusque ulne uiginti denariorum cum fururra pallii de agnis ita quod quolibet anno habebit unam tunicam et quolibet secundo anno pallium de supradicto precio et botas feltratas singulis annis ad festum sancti Michaelis Item concessimus prenominato Roberto in singulis annis in uita sua uiginti solidos sterlingorum ad alia sibi necessaria et ut habeat equum suum in stabulo abbatis ad fenum et prebendam et ad ferros et ad clauos In quod necesse fuerit utemur eo de licencia eius in negociis domus nostre Item habebunt dicti Robertus et Matildis duodecim caretatas bosci infra mensem post festum sancti Iohannis Baptiste Concessimus autem prefato Philippo singulis annis ad festum sancti Michaelis unam robam scilicet capam tunicam super tunicam sine fururra precii cuiusque ulne duodecim denariorum et ad Pasca tunicam et supertunicam precii cuiusque ulne decem denariorum Item habebit lineam uestem [et unum pall]ium [semel per an]num Ad calciamenta uero duo paria estiualium per annum et unum par sotilarium ad laqueos et unum par caligarum [] Ad lectuarium autem semper post triennium unum chalonem et semper post biennium duo linteamenta [] et quando nouos pannos lineos et noua calciamenta recipiet reddet sursum uetera Habebit etiam idem Philippus [equum s]uum in stabulo abbatis sicut dictus Robertus pater eius et utemur eodem equo cum necesse fuerit per licenciam eiusdem Philippi Si [uero idem] Philippus superuixerit dictum Robertum patrem suum habebit dictos uiginti solidos quos Robertus pater eius percipere [solebat] et tales robas quales pater eius percipiebat ad eosdem terminos et in cibo et potu sicut pater eius solebat et liberacionem unius garcionis sicut garcio patris eius habere solebat et tunc predictus Robertus frater eius habebit quicquid idem Philippus solebat in uita patris sui subtractis autem omnibus que prius idem Robertus percepit Concessimus insuper eidem Roberto semel per annum quoad uixerit tunicam et super tunicam et capam precii cuiusque ulne decem denariorum et una estiualia per annum ad festum sancti Michaelis Si autem idem Robertus superuixerit prenominatum Robertum patrem suum et prefatum Philippum fratrem suum recipiet quoad uixerit quicquid idem Philippus percipere solebat preter dictos uiginti solidos Nulli autem dictarum personarum licebit uendere uel inuadiare memorata beneficia nisi de concensu nostro Et ut ea que predicta sunt rata et inconcussa secundum formam prescriptam permaneant nos huic scripto sigillum nostrum apposuimus Hiis testibus []