Charter Document - 02521310
| Charter Number: | 02521310 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1298 |
| Date type: | Internal, A.D., Feast |
| Resource Link(s): |
Monasterium.net |
Charter:
In virginis filio dilectis ac reverendis sororibus domine Herbvrge venerabili abbatisse in Kyemse totique collegio sanctimonialium ibidem frater Fridericus abbas in Raitenhaslach totusque conventus ibidem ordinis Cysterciensis oraciones fervidas et devotas ac ipsas facie ad faciem in Syon speculari gloriam pulcherrimi sui sponsi Ut divini amoris arbores in nobis suum fructum proferant germinantes floridam caritatem que deo sit amabilis et hominibus graciosa et ut ortus deliciarum oracionum sanctarum clavibus possit nobis facilius aperiri ut ingressi cum rege summo in pulchritudine delectabili et amena perpetuo iocundemur peticioni vestre nobis per fratrem Ottonem cantorem nostrum Saxonem oblate applausu benevolo duximus hylariter occurrendum dantes vobis fraternitatem et omnium bonorum participacionem videlicet missarum ieiuniorum iugis silentii disciplinarum elemosinarum aliorumque bonorum que in nobis perpetuo operabitur benigna clementia salvatoris in vita vestra pariter et in morte ita ut dum obitus cuiuscumque persone vestre nostro fuerit capitulo nunciatus ibidem absolvamini tamquam nostri Et ut vinculum huius sancte confederacionis solidum maneat atque firmum presentes litteras vobis dedimus sigilli nostri karactere consignatas anno domini millesimo ducentesimo nonagesimo VIII in festo sanctissime trinitatis