Charter Document - 02521296

Ich Alhait von Tann vergihe vnt tun chunt allen den di disen brief ansehent oder horent lesen daz ich durih got vnt durich vnser frauwen willen vnt durih meiner sei hail vnt seid vnt aller meiner vorfodern sel selichheit mein mul datz Schozbach di mein rehtez aigen ist wan si mein lieber vater dem got genad fur rehtez aigen chauft von dem Swalben von Dornberch vmb sehs vnt dreisich pfunt Regensburger vnt hat si in nutz vnt in gewer gehapt an aigens stat vntz an sein ende an all ansprahe vnt an allen chrieg di han ich gegeben vnser frauwen vnt dem gotzhaus datz Raitenhaslach ze rehten selgret gar vnt gentzleihen mit allem dem daz dar zu gehort ve[r]sucht vnt vnversucht swi iz genant ist vnt han daz getan mit verhengnuss vnt guten willen meins hercenlieben wirtez hern Ekharts von Tann Ja halt daz dicz selgret dester besser chraft hab ewichleichen han ich nah meins lieben herren vnt vater rat vnt Weisung dez ersam aptz Chunratz von Raitenhaslach daz gotzhaus ze Raitenhaslach vnt di sammenung da selb gesetzet in nutze vnt in gewer bei meinem lemtigern leib dar vmb daz si daz vorgenant gotshaus dester sicherleichen hab vnt besitz an allen chrieg vnt an all ansprahh Vnt daz daz also stet vnt vest beleih an all ansprah vnt storung han ich dem gotzhaus ze Raitenhaslach vnt der samnung da selben gegeben disen brief versigelten mit meins hercenliebes wirtez dez vorgenanten hern Ekhartz von Tann insigel ze einem waren vrchund Des sint gezivch mein wirt her Ekhart von Tann her Chunrat der pfarer datz Muldorf vnt sein geselle her Vlreih her Hartman von Holtzhausen Leutwein der schulmaister Engelbreht von Sikking Liebhart der Tegen Rapot der Lukehe Chunrat vnt Hainr[eich] die Gallen Rudolf Gotred vnt ander erber geziveh genueg Der brief ist gegeben dez jares do von vnsers herren geburt waren tausent jar zwai hundert jar in dem vier neuntzigistem jar an sand Philipez tag datz Muldorf