Charter Document - 02520536

Ich Chunrad von Puesing vnd mein hawsfrawnn Elspet vnd mein sun Hanns vnd Stephann vnd Andree verjehen an disem brief offenbar das der ersam herr abbt Fridreich vnd der conuentt von Raytenhaslach vns lassen habent ir hub datz Puesing bey Chemnaten in dem Geren zw vnser fumf leiben vnd nicht lenger mit der beschaidenchait das wir in alle jar von der genanten hub sullen geben ze dinest ain halbes phunt Ottinger pfenning an sand Michels tag oder hin nach inner vierzehen tagen Swenn wir das versawmen so waren wir geuallen von allem dem rechten das wir an der hub gehaben mochten als oben verschriben ist Vnd swenn wir fumf nicht mer sein so sol dew genant hueb dem chloster ze Raitenhaslach fryleich ledich sein das dhain vnserr erbe oder frewnt dar nach chain ansprach haben sol Wir sullen auch die mul datz dem oftgenanten Puesing inne haben ze vnserr fumf leibem in allem dem rechten als vmb die hueb verschriben ist Das die sachen den herren von Raitenhaslach stat beleib geben wir in disen brief ze vrchund versigelten mit des erwern mannes hern Wernhartz aus dem Holtz ze den zeitten richter datz Purchawsen insigel der das nach vnser pet dar an gelegt hat wan wir selbs aigens insigels nicht haben vnd pinden wir vns dar vnder dem Wernharten an allen schaden Des sind gezeug Winther der Brost Chunrad der Pischolfstorfer Vlreich von Repoching Dietel von Lengtal Ott der Weichsler vnd ander piderlawt genueg Der brief ist geben MCCCL an sand Pangracii tag