Charter Document - 02520535

Ich Eberwein Otten sun dez Cholben vergich offenbar an disem brief allen den di in sehent oder hornt lesen daz ich mit meiner hausfrawn vnd vnser paid erben vnd mit vnser aller frevnt rat vnd gantzem willen vns verzigen haben aller der ansprach vnd rechtes di mein vater Ott der Cholb hat gehabt hintz dem gotzhaus von Raitenhaslach vmb vier phunt phenning deu er offt gemelt hat in der stifft ze Westendorf daz man im di gelten schult an der hub ze Prunn dev er emaln verchaufft hat vnda im auch daz gotzhaus von Raitenhaslach nie chainez geltes noch ansprach vergehen hat der selben ansprach vnd aller ansprach vnd rechtes di wir haben hintz dem obgenanten gotzhaus vnd hintz allem seinem aigen wo iz in dem land gelegen ist verzeich wir vns gantzleich vnd ledichleich mit allen Sachen vmb di trew vnd genad der ich wart von dem vor genanten chloster daz mich der eberg herre abbt Fridreich stifft auf daz gut ze Standelein ze pavmans recht ain jar vmb den dienst vnd vodrung vnd alle nutz alz ander paulawt daz selben gut vor dient habent Vnd wenn ich dem obgenanten abbt vnd dem gotzhaus ze Raitenhaslach auf dem selben gut nicht fueg so schol ich dar ab varn an allen chrieg vnd ansprach vnd schullen si daz gut stifften alz ander ir freys aygen Vnd daz disev handlung vnd sache dem gotzhaus ze Raitenhaslach gantz vnd stat beleib dar vber gib ich in disen brief ze vrchunt versigelten mit anhangunden insigel hern Vlr[eich] dez Puechpechken pei der Rot der daz nach meiner pet im vnd allen seinen erben an schaden dar an gelegt hat Daz ist geschehen anno domini MCCCL in die beatorum martyrum Fabiani et Sebastiani