Charter Document - 02520534

Ich Margret von Ror vergich vnd tun chunt offenbar an dem brief allen den di in sehent oder hornt lesen daz ich den erbern herren abbt Vlr[eich] vnd dem conuentt ze Raitenhaslach schuldich belaib von meinen lieben vater vnd muter vnd andern meinen erberen seligen hundert pfunt Saltzburger pfenning Vnd ich sev der selben pfenning mit beraitscheftt nicht berichten mochtt han ich in geben mein freyes aygen di zwen hof ze Hofschalichen besucht vnd vnbesucht mit allen den rechten vnd gulten di dar zv gehornt als ir hantfest sagent di si von mir dar vber habent Nv vergich ich vnd hat auch mich mein gewizzen dez ermont daz ich dem selben herren abbt Vlr[eich] vnd dem conuentt ze Raitenhaslach mein vreyes aygen daz da haizzet Reysach bey den oben genanten hofen gelegen ist durch mein selbers hail vnd selden willen vnd aller meiner nachchomen geschart vnd geben han ze einem rechten selgeret ze der zeit vnd weil do ich daz wol mocht getun vnd wil auch daz si dar an niemant irr oder eng vnd alle mein nachchomen in daz stet behalten Vnd dar vber ze einem ewigen vrchund vnd stetichait gib ich in disen brief mit meinem anhangendem insigel versigelt Der gegeben ze Purchausen do von Christes geburtt engangen worden dreutzzehen hundert jar dar nach in dem newn vnd viertzzigistem jar an vnser frawn tag als si gebornt wart