Charter Document - 02520533

Ich Jans von Prettach vergich vnd tun chunt allen den die disen brief lesent oder horent lesen die nv lebent vnd hernach chunftich sind daz ich mit gutem willen mit verdachtem mvt zv der zeit do ich iz wolgetun mocht vnd mit meins pergmaisters hant Cholmans zv den Zeiten amptman ze Radendorf der erbern gestleichen herren von Melch recht vnd redleichen ze einem rechten widerwechssel gegeben han meinen weingarten der do leit ze Chremse auf der hayde dez fumf jeuch ist da man alle jar von dient in den hof ze Radendorf fumf vnd sibentzich Wienner phening ze perchrecht vnd nicht mer mit allem dem nvtze vnd rechten alz ich in in perchrechtes gewer her pracht han den erbern gestleichen herren abt Vlreichen vnd dem conuent gemainen ze Raitenhaslach vnd allen irn nachchomen furbaz ledichleichen vnd vreyleichen ze haben vnd allen irn frumen da mit ze schaffen verchauffen versetzen vnd geben swem si wellent an allen irrsal Vnd haben auch si mir da engegen zv einem rechten widerwechssel gegeben zwen weingarten die da ligent oberhalb Engelschalichstorf bey Liechtenstaine der ainer haizzet der Schreiber vnde der ander der Plewer also daz ich vnd mein erben da mit suln auch ledichleichen vnd vreileichen allen vnsern frumen schaffen verchauffen versetzen vnd geben swem wir wellen an allen irsal Vnd pin auch ich vnd mein erben vnuerschaidenleich dez vorgenanten weingarten ze Chremse der egenanten gestleichen herren Abt Vlreichs vnd des conuents gemaine ze Raitenhaslach vnd aller ir nachchomen recht gewern vnd scherm fur alle ansprach als perchrechtes vnd widerwechssels recht ist vnd des landes recht ze Osterreich Wer aber daz si mit recht an dem selben weingarten icht chrieges oder ansprach gewunnen von swem daz wer swaz si dez schaden nement daz sol ich in alles auz richten vnd wider chern an alle ir mve vnd an allen irn schaden vnd suln auch si daz haben auf mir vnd durch pezzer sicherhait auf den vorgenanten zwain weingarten ze Engelschalichstorf die si mir ze einem widerwechssel da engegen geben habent vnd auf allem meinem gut daz ich han in dem lande ze Osterreich ich sey lebentich oder tode Vnd daz diser widerwechssel furbaz also stet vnd vnzerbrochen beleihe dar vber so gibe ich in disen brief ze einem warn sichtigen vrchunde vnd ze einer ewigen vestunnge diser sach versigelten mit meinem insigil vnd mit meins pergmaisters insigil dez vorgenanten Cholmans von Radendorf vnd mit dez erbern herren insigil hern Stephans von Meyssaw obrister marschalich in Osterreich die diser sach gezeug sind mit irn insigiln Diser brief ist geben ze Wienne nach Christes geburde drevtzehen hundert jar dar nach in dem nevn vnd viertzgisten jar dez mittichens in den phingst veyrtagen