Charter Document - 02520531

Wir bruder Vlreich abbt vnd alle di sammung dez chlosters ze Raitenhaslach verjehen an disem brief allen den di in sehent oder horent lesen daz vns der erberig beschaiden man Johannes der Galle purger ze Muldorf vnd sein hausfrawe Lucia mit willen vnd gunst aller ir erben do si ez wol getun mochten habent gegeben vnd geschafft ze rechtem selgrat ir aigens gut daz genant ist daz Gumppel vnd nahen gelegen ist pei der stat ze Muldorf mit allen nutzen eren vnd guolt besucht vnd vnbesucht daz dar zu gehort als si is selber inne habent gehabt mit der beschaidenhait daz wir ir baider jartag Johanses vnd Lucey di oben genant sint alle jar begen sullen nach vnsers ordens gewonhait mit vigilii vnd mit mess dez nachsten tags nach sand Thoman tag vor weynachten vnd sol dez selben tages ieder herr vnd bruder getrost werden mit einem trinchen walischs weins mit zwain stukchen gesultzzter visch vnd mit einem weissen prot von der gult vnd von dem dienst der von dem obengenanten gut gevallen vnd bechomen mag jerleich Vnd war daz chain prest auf daz vorgenant gut cham von schaver pises oder von landes vrleug daz wir dez dienstz von dem genanten gut nicht gehaben mochten an gevar dez selben jares sullen wir dez dinstz dem conuent als oben verschriben ist nicht suldikch ze geben sein War aber daz wir savmikch waren daz wir den dinst an dem jartag als oben verschriben ist swenn er gevallen mag vnserm conuent nicht geben so sol vnserr vater der abbt von Salmansweiler dez selben jares allen den nutz vnd dienst in nemen vnd hin haim pringen seinem conuent der von dem offt genanten gut gevallen mag daz sein conuent da von getrost wirt vnd sol daz furbaz anderev jar vnserm conuent an allen schaden sein Daz in daz also stat vnd vnzebrochen beleib geben wir in ze vrchund disen brief mit vnsern anhangenden insigeln der geben ist do von Christes gepurt waren tausent jar drevhundert jar dar nach in dem echt vnd viertzigistem jar an sand Thomas tag vor weichnachten