Charter Document - 02520530

Ich Margret von Ror vergich vnd tun chunt offenbar an disem brief allen den di in sehent oder hornt lesen wan mein liebew muterl fraw Sophey von Walde selig mit veraintem vnd wolbedachtem mut an ir lesten zeiten do si ez wol macht getun ze einem ewigen hail vnd selgerat ir vnd allen iren voruordern vnd nachchomen schuf dem gotshaus vnd dem conuentt ze Raitenhaslach dreizzig pfunt Saltzburger pfenning dar zv schuffen mein lieb svn her Vlreich vnd Ortlieb selig an ir lesten zeiten do si ez auch wol mochten getun in vnd auch iren voruordern vnd nachchomen ze einem ewigem selgrat dem egenantem gotshaus vnd dem conuentt ze Raitenhaslach datz mir dreizzich pfunt Saltzburger pfenning daz werdent also sechtzzig pfunt Saltzburger pfenning der ich dem gotshaus vnd dem conuentt ze Raitenhaslach von iren wegen schuldich beleib vnd gelten sol Vnd wan ich si der pfenning gern mit beraiten pfenning hilfleichen vnd furderleichen gewert hiet chund noch mochtt ich der weg nicht ervinden da mit ich daz gelt hiet gestalt vnd bin mit veraintem vnd wolbedachtem mut vnd mit gutleichem willen mein vnd auch dar zv mit Wullfings dez Goldekker willen wizzen vnd gunst vnd auch nach seinem rat der mein eninkchel Angnesen hat vnd dem ich ander mein hab gegeben vnd gemachtt han nach meinem tod bin vberain chomen also daz ich dem vorgenantem gotshaus vnd dem conuentt ze Raitenhaslach fur die selben sechtzzikch pfunt Saltzburger pfenning redleichen vnd cheufleichen ze chauffen gegeben han mein zwen hof ze Hofschalichen di bayde rechtes freyes aygen sint mit allen den eren vnd nutzzen di dar zv gehornt ze holtz ze velde ze wayde ze wazzer vnd gemainchleichen mit allen andern den rechten swie di von alten rechten vnd alter gewonhait dar zv gehornt vnd da von bechoment vnd bechomen mugen besuchten vnd vnbesuchten vnd als mein voruodern vnd ich die selben hof vntz auf den tag hevt gehandelt genozzen vnd inne habent gehabt also han ich dem gotshaus vnd dem conuentt ze Raitenhaslach mit der selben gult vnd mit den rechten der selben hof heut ze tag ze nutzz vnd ze gewer gesatzzt vnd sullen di inne haben bestiften vnd entstiften als ander ir vrbar vnd sol der ir gewer sein als aygens vnd dez landes recht ist vnd sol auch in di stat dar vber tun di ze recht dar vber gehornt Also auzgenomenleichen chauffich oder der vorgenant Wulfing der Goldekker di egenanten hof her wider von in von dem lichtmesse tag der nu schirst chumt vnd dar nach vber vier gantzzew jar alle jar in den selben vier jaren viertzehen tag vor dem lichtmesse tag oder viertzehen tag nach dem lichtmesse tag sullen si mir vnd dem offtgenantem Wulfing dem Goldekker nicht versten auf den selben tag si geben vns di egenanten hof vmb di vorgenanten sechtzzig pfunt Saltzzburger pfenning di danne gib vnd geb sint her wider ze chauffen chauffen aber ich oder der genant Wulfinch der Goldekker der hof auf den selben tag von in her wider nicht so sullen ich der genant Goldekker ander mein erben frewnt vnd nachchomen hintz den vorgenanten hofen hintz den rechten vnd der gult di dar zv gehornt vnd auch hintz dem gotshaus vnd dem conuentt ze Raitenhaslach ewichleichen dar vmb dhain ansprach nimmermer haben noch gewinnen weder mit recht noch an recht gaistleichen oder werltleichen Man sol auch wizzen daz die vorgenanten hof mit aller ir gult diensten vnd nutzzen dienen sullen dem conuentt ze Raitenhaslach in ir pittantzze vnd sullen die vorgenanten herren vnd der conuentt ze Raitenhaslach alle jar jerleichen vnd ewichleichen meines lieben wirtes herren Heinreichs von Ror seligen vnd andrer meiner voruordern vnd nachchomen jartag begen an dem andern tag nach sand Vlreichs tag mit einer vigilii an dem abent vnd dez morgens mit einer messe vnd an dem selben jartag sol man ewichleichen von der gult di von den hofen chumt einem iegleichem herren geben ein trinchen welischs weins ein weizzes brot vnd zway stukch gesultzzter vischs Vnd swelhes jares an irm jartag daz den herren versaumet wurt daz man in dez nicht geb swaz danne von den hofen daz jar dar inne in der trost nicht gegeben ist dienstes vnd gult chumt vnd chomen mag den selben dienst allen sol dez selben jares der abbtt von Salmansweiler nemen vnd seinem conuentt hin haim furn Vnd ob ich vnd der obengenant Wulfinch der Goldekker die vorgenanten hof her wider von in chauffen so sol man den herren vnd dem conuentt die vorgenanten sechtzzikch pfunt Saltzzburger pfenning an aygen vnd vrbar legen in ir pittantzz vnd daz si ewichleichen alle jar an vnserm jartag da von haben den trost als der oben ist verschriben Vnd dar vber ze vrchund gib ich in den brief mit meinem vnd ze einer pezzern stetichait mit dez offt genantem Wulfings dez Goldekker anhangenden insigeln versigelten Dez sint zeug her Vlreich ze den zeiten prior her Peter der Newmaister payd munich ze Raitenhaslach Fridr[eich] von Insprukk Heinr[eich] der Riser Berchtold der Zinkk Fridr[eich] der Zinkk Vrban der Schreyber Chvnr[at] der Eider alle purger ze Purchausen Wernher der Talweger Vlreich von Rechpokching vnd ander erber lewt genueg Daz ist geschehen do man zalt von Christes geburtt tausent jar drewhundert jar dar nach in dem echt vnd viertzzigistem jar an aller heyligen tag