Charter Document - 02520529

Ich Lawtl des alten Formaister sun vnd mein hawsfraw Margret vnd alle vnser erben dy wir yeczund haben oder furbaz gewinnen verjehen vnd tun chund offenbar an disem briff allen den dy in sehent oder horent losen daz wir mit vergintem vnd wolgedachtem mut vnd mit gutlichen vnserm willen chauffleichen ze chauffen haben gegeben dem erberen mann Heinr[ich] dem Riser purger ze Purch[awsen] seiner hawsfrawn vnd iren erben vnser hub dy Hulghub ze Erhartstorff dy rechtes freyes aigen ist mit allen den rechten eren vnd nuczen ze holcz ze velde ze wayde vnd cze wasser vnd gemainchkleichen mit allen den rechten chlainen vnd grossen dy dar czu gehorent vnd da von bechoment oder bechomen mugen besuchten vnd vnbesuchten alz vnser vorvordern vnd wir dy selben hub gehandelt genozzen vnd inne haben gehabt vmb czwainczig pfund haller vnd pfenning der sy vns gar vnd ganczlichen verricht vnd gewerdt habent also daz wir vnser erben vnser frewndt vnd alle vnser nachkomen hincz dem vorgenanten Heinr[ich] dem Riser hincz seiner hawsfrawn hincz allen iren erben vnd iren nachkomen vnd auch hincz der vorgenanten hub vnd hincz den rechten vnd nuczen dy dar czu gehorent ebichleichen chain ansprach nimmermer gehaben noch gewinnen sullen noch mit chainerlay anvallung anvallen wye wir vns der erdenkchen oder erfunden mochten werden War aber daz in an der obgenanten hub yemandt dhain chrieg oder vnderpruche tate von welcherlay irrung oder anvallen daz geschach dar an sullen wir sy vertreten vnd versprechen alz dez landes recht auf freyem aigen ist Taten wir dez nicht welhen schaden sy dez nemment daz sullen sy haben auf vnserm leib vnd gut dar zu auf vnser aller hab besucht vnd vnbesucht vor allen andern lawtten vnd vnsern geltern Wer auch den briff mit ir willen vnd wissen inne hat vnd vns da mit mandt der selbe oder dy selben habent alle dy recht auf der obgenanten hub in aller der mazze alz oben vmb sich selber verschriben ist Wey der tayding vnd dem chauffe gewesen sind herr Frid[rich] von Insprukh Seyfrid der Iring Seybolt von Hukking der Plvm von Wankchausen Hainr[ich] von Ganchking Chainr[ad] von Gnadlazz vnd ander erberg lewt genueg Daz in daz also stat gancz vnd vnczeprochen beleib dar vber zu einem vrchunde geben wir in disen briff mit her Lud[weig] aus dem Holcz anhangunden insigel versigelten der daz nach fleizziger vnserr pet im vnd allen seinen erben an schaden dar an gelegt hat dar vnder wir vns alz wir oben benant sein mit vnsern trewn verpinden alles daz stat ze haben vnd ze volfuren daz oben ist verschriben Der geben ist an sand Michels tag MCCC quadragesimo octavo