Charter Document - 02520528

Wir Margret von gotes genad Romischev kayserinn enbieten vnsern pflegern richtern vnd gemain chleich allen vnsern amptlauten wa di gesezzen sint in vnser herschaft di ietzund sint oder furbaz werdent vnser huld vnd alles gut Wir lazzen euch wizzen das wir vnser lieb diemutig abbt Vlr[eich] vnd den conuentt ze Raitenhaslach in vnsern besundern schirm vnd genad genomen haben also daz wir in alle die hantfest die si von vnserm lieben herren kayser Ludweigen saelig vnd von seinen vordem oder von der herschaft ze Bayern habent si sein vber gerichtt mautt oder zolle vnd ander sache swi di genant sein bestatt haben vnd bestaten in di mit disem brief in allen den rechten als ir hantfest sagent di si dar vber habent di wir gesehen vnd gehort haben Wir wellen auch vnd gebiten allen vnsern amptleuten flegern richtern vnd scherigen swi si genant sint di ietzunt sint oder furbaz werdent daz si dhainerlay sache richten oder handeln hintz dez vorgenanten gotshaus ze Raitenhaslach laut vnd guten swa si di habent in vnserr herschaft daz wider ir hantfest sei vnd auch ir hantfest verhorn auf schranne oder anderswo swa si dez gerent oder bedurffen Vnd da von wellen vnd gebiten wir ew allen vnd igleichem besunder vestichleich vnd ernstleichen bei vnsern hulden vnd bei den wandeln die ir hantfest sagent daz ir in di selben brief vnd genad di wir in getan haben stet haltend vnd in di nicht vberuart noch si mit dhainen sachen dar an irrent noch beswarnt als ir vnser vngenad vermeiden wellet Ze vrchund dises briefes der geben ist ze Munichen an vnser frawn tag als si geborn wart nach Christes geburtt dreutzehen hundert jar vnd in dem aecht vnd viertzigstem jar