Charter Document - 02520526

Ich Jacob der Phanshueter purger ze Chrems vnd ich Margret sein hausvrowe vnd vnser payder erbn wir verjechen offenbar mit disem brief allen den di in schechent oder horent lesen daz wir mit woll verdachtem muet vnd mit gesampter hant vnd mit gunst vnd guetleichem willen aller vnser erbn vnd auch nach rat vnser pesten freunt recht vnd redleich ze chauffen haben gebn dem erbern mann Perchtolten dem Czinken purger ze Pvrchausen vnd sein erbn vnsern weingarten der da leyt an dem obern Lintperg ze naest Jansen weingarten des Schreiber svn von Minpach des ein jeuch ist vmb scheczig pfunt phening Wienner mvncz der wir gancz vnd gar gewert sein ze rechten taegn vnd deu si auch hincz den juden fur vns habent gebn Vnd haben in den egenanten weingarten auf gebn ledig vnd vnuerchvmbert mit des perchmaisters hant hern Hainreichs des Chrautwurems di zeit sluzzler ze Chrems an des herczogen hof dem man da von geyt ze purchrecht an sand Michels tag zehen phening vnd nicht mer der auch des egenanten weingarten di zeit styffter vnd storrer ist gewesen Vnd haben yn den weingarten auf gebn mit allen den nuczen vnd rechten vnd wir in pvrchrechts nucz vnd gewer vnuersprochenleich her haben gehabt vnd pracht Seu mugen auch furbaz hin fur ewichleich mit dem offt genanten weingarten oder swer den prief an ir stat in hat allen irren frvmen schaffen an alle irrung mit verseczen vnd mit verchauffen juden vnd christen vnd geben swem seu wellent so yn daz aller pest chvmt vnd fuegt Wir schullen auch des egenanten weingarten ir rechter scherem sein fur alle ansprach allez purcrechtes recht ist vnd gewonhait des landes ze Osterreich vnd auch fur alle vnser erbn seu sein vogper oder vngevoper seu sein in der lancz oder auzzer landes Vnd waz seu des scherms schaden nem hincz jvden oder hincz christen oder wie ein rechter schad genant wer den ir ains vngesworen pey sein trewen gesagen mag den schullen wir in ab tun an fvrbot vnd an chlag gancz vnd gar Vnd daz schullen seu haben auf vns vnd auf alle die vnd wir haben in dem lande ze Osterreich oder swo wir icht haben auf land vnd auf wazzer vnd auch auf vnsern trewen Vnd daz in vnd auch vns di red furbaz stet vnd vnczebrochen peleyb des gebn wir in disen brief zv einem offen vrchund vnd waren zeugen diser sache versigelten mit meins egenanten Jacobs insigell vnd auch mit des vorgenanten perchmaisters insigell vnd auch durch pesser staetichait willen haben wir gepeten den erbern mann hern Pettern di zeit stat richter vnd juden richter ze Chrems daz er sein insigell zv einem zeug diser an disen prief gehangen hat ym an schaden Der prief ist gebn nach dreuczehn hvndert jaren von Christi gepurd darnach in dem acht vnd vierczkistem jar ze phingsten